ডিজিটেল ডেস্কঃ যোৱা মাহত মৃত্যু হোৱা ইটালীৰ প্ৰাক্তন প্ৰধানমন্ত্ৰী ছিলভিও বাৰ্লুস্কোনিয়ে নিজৰ উইলত নিজৰ ৩৩ বছৰীয়া প্ৰেমিকা মাৰ্টা ফাচিনাক ১০ কোটি ইউৰো (৯,০৫,৮৬,৫৪,৮৬৮ টকা) এৰি থৈ গৈছে বুলি দ্য গাৰ্ডিয়ানে প্ৰকাশ কৰিছে। ইটালীৰ তিনিবাৰৰ প্ৰধানমন্ত্ৰীগৰাকীৰ সাম্ৰাজ্যৰ মূল্য ৬ বিলিয়ন ইউৰোতকৈও অধিক বুলি অনুমান কৰা হৈছে।
মিছেছ ফাচিনাই ২০২০ চনৰ মাৰ্চ মাহত মিষ্টাৰ বাৰ্লুস্কোনিৰ সৈতে সম্পৰ্ক আৰম্ভ কৰিছিল। যদিও দুয়ো আইনগতভাৱে বিবাহপাশত আবদ্ধ হোৱা নাছিল, তথাপিও তেওঁ মৃত্যুশয্যাত তেওঁক নিজৰ ''পত্নী'' বুলি উল্লেখ কৰা বুলি জানিব পৰা গৈছে।
২০১৮ চনৰ সাধাৰণ নিৰ্বাচনৰ পিছৰে পৰা ইটালীৰ সংসদৰ নিম্ন চেম্বাৰৰ সদস্য হিচাপে কাৰ্যনিৰ্বাহ কৰি আহিছে ৩৩ বছৰীয়া ফাচিনাই। ১৯৯৪ চনত মিষ্টাৰ বাৰ্লুস্কোনিয়ে প্ৰথমবাৰৰ বাবে ৰাজনীতিত প্ৰৱেশ কৰাৰ সময়ত প্ৰতিষ্ঠা কৰা দল 'ফৰ্জা ইটালিয়া’ৰ সদস্য ফাচিনা।
ইফালে বাৰ্লুস্বোনিৰ ব্যৱসায়িক সাম্ৰাজ্য তেওঁৰ দুই সন্তান মেৰিনা আৰু পিয়ৰ ছিলভিঅ’ৰ নিয়ন্ত্ৰণত থাকিব। ইতিমধ্যে এই ব্যৱসায়ত কাৰ্যবাহী ভূমিকা গ্ৰহণ কৰা এই যুটিটোৱে ফিনিনভেষ্ট পৰিয়ালৰ হোল্ডিঙত ৫৩ শতাংশ অংশীদাৰিত্ব লাভ কৰিব।
ইয়াৰ উপৰিও তেওঁ ভাতৃ পাওলোক ১০০ মিলিয়ন ইউৰো আৰু মাফিয়াৰ সৈতে জড়িত হোৱাৰ বাবে জেলৰ সময় কটাবলগীয়া হোৱা তেওঁৰ ফৰ্জা ইটালিয়া দলৰ প্ৰাক্তন চিনেটৰ মাৰ্চেলো ডেল’উট্ৰিক এৰি থৈ গৈছিল।
ব্যৱসায়ী আৰু প্ৰধানমন্ত্ৰী হিচাপে দশক দশক ধৰি ইটালীৰ জনজীৱনত আধিপত্য বিস্তাৰ কৰা মিষ্টাৰ বাৰ্লুস্কোনিৰ ১২ জুনত ৮৬ বছৰ বয়সত মৃত্যু হয়।
Continue Reading
