অভিনৱৰ পিছত অন্য এজন অসম সন্তানৰ অভিলেখ, কমনৱেলথ ভাৰোত্তোলনত বেদব্ৰতৰ স্বর্ণ

ডিজিটেল ডেস্ক : অভিনৱ গগৈয়ে গড়া অভিলেখৰ খলকনি নৌ মাৰ যাওঁতেই ডিব্ৰুগড় জিলাৰ বেদব্রত ভৰালীয়ে চমক সৃষ্টিৰে কমনৱেলথ ভাৰোত্তোলনৰ স্নেটছ, ক্লীন এণ্ড জাৰ্ক তথা সামগ্রিক ওজন উত্তোলনত তিনিটা নতুন অভিলেখ গঢ়ে।

দ্বিতীয়গৰাকী অসম সন্তান ৰূপে স্বর্ণপদকেৰে গৌৰৱৰ এক নতুন অধ্যায়ৰ সূচনা কৰিলে। আহমেদাবাদত অনুষ্ঠিত আন্তর্জাতিক প্রতিযোগিতাখনত ল'ৰাৰ জুনিয়ৰ শাখাৰ ৭৯ কিল'গ্রাম ওজনত খেলা বেদব্রতে বৃহস্পতিবাৰে স্নেটছত ১৪৫ কিল'গ্ৰামৰ বিপৰীতে ক্লীন এণ্ড জার্কত ১৮১ কিল'গ্রামসহ সামগ্রিকভাৱে মুঠ ৩২৬ কিল'গ্রাম ওজন উত্তোলনেৰে প্রত্যাশিতভাৱে দেশ তথা ৰাজ্যবাসীলৈ স্বর্ণজয়ী গৌৰৱ কঢ়িয়াই আনিলে।

ইয়াৰ পূৰ্বে বেদব্রতে দেশৰ প্ৰথমগৰাকী ভাৰোত্তোলক ৰূপে বিশ্ব যুৱ চেম্পিয়নশ্বিপত সোণ অৰ্জন কৰি ইতিহাস ৰচনা কৰি থৈছে। ভাৰতীয় ভাৰোত্তোলন সন্থাই আয়োজন কৰা আহমেদাবাদৰ বীৰ ছাভাৰকাৰ ক্ৰীড়া প্রকল্পত চলি থকা প্রতিযোগিতাত ৩২৬ কিল'গ্রাম ওজন উত্তোলনৰ জৰিয়তে তেওঁ তৃতীয়টো কমনৱেলথৰ অভিলেখ গঢ়িবলৈ সক্ষম হয়। উল্লেখযোগ্য যে ব্রেদৱতৰ পূর্বে বুধবাৰে ল'ৰাৰ যুৱ শাখাৰ ৭১ কিল'গ্রামত অসম সন্তান অভিনর গগৈয়ে একেই অভিলেখ গঢ়ি সোণ লাভ কৰিছিল।

গৌৰৱৰ বিষয় এয়ে যে চলিত প্রতিযোগিতাখনত অসমৰ যি পাঁচগৰাকী ভাৰোত্তোলকে দেশক প্রতিনিধিত্ব কৰিছিল আটাইকেইগৰকীয়ে সোণ অৰ্জন কৰি আন এক নতুন অভিলেখ গঢ়ে। ইয়াৰ পূৰ্বে অসমৰ ধৰ্মজ্যোতি দেউঘৰিয়াই ল'ৰাৰ যুৱ শাখাৰ ৫৬ কিল'গ্ৰামত কমনৱেলথৰ নতুন অভিলেখ গঢ়ি সোণ লাভ কৰাৰ বিপৰীতে ছোৱালীৰ যুৱ শাখাৰ ৫৮ কিল'গ্রাম শাখাত ভাবনা গগৈয়ে সোণ অর্জন কৰিছিল। আনহাতে, ল'ৰাৰ জুনিয়ৰৰ ৭১ কিল'গ্রাম শাখাত অসমৰ হেমন্ত দৈমাৰীয়ে সোণৰ পদক অৰ্জন কৰিবলৈ সক্ষম হয়।

উৎসঃ দৈনিক জনমভূমি