ছাব-জুনিয়ৰ গাৰ্লছ ৰাষ্ট্ৰীয় ফুটবল চেম্পিয়নশ্বিপ ; ফাইনেলত ঝাৰখণ্ড, মণিপুৰ

ডিজিটেল ডেস্ক : সৰ্বভাৰতীয় ফুটবল ফেডাৰেশ্যনৰ উদ্যোগত যোৰহাট জিলা ক্রীড়া সন্থাৰ তত্ত্বাৱধানত যোৰহাট ষ্টেডিয়ামত চলি থকা ছাব-জুনিয়ৰ গাৰ্লছ ৰাষ্ট্ৰীয় ফুটবল চেম্পিয়নশ্বিপৰ শুকুৰবাৰে পুৱা অনুষ্ঠিত হোৱা প্ৰথমখন ছেমি ফাইনেলত ঝাৰখণ্ড ফুটবল দলে মহাৰাষ্ট্ৰ ফুটবল দলক একমাত্র গ'লত পৰাভূত কৰি চূড়ান্ত খেলত উপনীত হৈছে। আক্রমণ প্রত্যাক্রমণেৰে ভৰপূৰ খেলখনত ঝাৰখণ্ড ফুটবল দলৰ হৈ গ'লটো দিয়ে নেনচি মুণ্ডাই।

আনহাতে, দ্বিতীয়খন ছেমি ফাইনেলত মণিপুৰ ফুটবল দলে বিহাৰ ফুটবল দলক টাইব্ৰেকাৰত সামগ্রিকভাৱে ৫-৪ গ'লত পৰাভূত কৰি চূড়ান্ত খেলত উপনীত হৈছে। নির্ধাৰিত সময়লৈকে ১-১ গ'লত ড্ৰ হৈ ৰয়। পুনৰ অতিৰিক্ত ৩০ মিনিটৰ খেলো ড্র হিচাপে সম্পন্ন হোৱাত টাইব্ৰেকাৰ পদ্ধতি অৱলম্বন কৰে। টাইব্ৰেকাৰত মণিপুৰ দলে চাৰিটা গ'ল কাৰ্যকৰী কৰা বিপৰীতে বিহাৰ দলে তিনিটা গ'ল দিবলৈ সক্ষম হয়।

মণিপুৰ ফুটবল দলৰ হৈ গ'লকেইটা কাৰ্যকৰী কৰিবলৈ সক্ষম হয় ক্রমে আশালতা দেৱী, নন্দিনী দেৱী, মংগলিবি ইৰ'ম আৰু ইৰ'ম দেৱীকা চানু। আনহাতে, বিহাৰ দলৰ হৈ গ'লকেইটা কাৰ্যকৰী কৰিবলৈ সক্ষম হয় পিংকী কুমাৰী, ঋতিকা কুমাৰী আৰু ৰিংকী কুমাৰী চৌহানে।

উল্লেখযোগ্য যে যোৰহাট ষ্টেডিয়ামখন এজাক বৰষুণত পানীৰে উপচি পৰাৰ ফলত দুয়োটা দলে অতিৰিক্ত পৰিশ্ৰম কৰিব লগা হ'ল। ৩০ আগষ্টত চূড়ান্ত খেলত অংশগ্ৰহণ কৰিব মণিপুৰ ফুটবল দল বনাম ঝাৰখণ্ড ফুটবল দল। সময় : সন্ধিয়া ৬-৩০ বজাত।

উৎসঃ দৈনিক জনমভূমি