অসমীয়া ভাষাৰ শ্রেষ্ঠ ছবি আদিত্যম শইকীয়াৰ 'ৰঙা টাপু ১৯৮২'

ডিজিটেল ডেস্ক : ৰাজ্যবাসীৰ বাবে সুখবৰ। অসমৰ কেইবাখনো ছবিয়ে ৰাষ্ট্ৰীয় পৰ্যায়ত সফলতা অর্জন কৰিবলৈ সক্ষম হৈছে। শুকুৰবাৰে ঘোষণা কৰা ৭১ সংখ্যক ৰাষ্ট্ৰীয় চলচ্চিত্ৰ বঁটা অনুসৰি এইবাৰ শ্ৰেষ্ঠ অসমীয়া ভাষাৰ ছবিৰ সন্মান লাভ কৰিছে আদিত্যম শইকীয়াৰ পৰিচালিত 'ৰঙা টাপু ১৯৮২' নামৰ ছবিখনে।

আনহাতে, প্রবাল খাওন্দৰ টাইফাকে ভাষাৰ ছবি 'পাই টাং- ষ্টেপ অব্ হ'প'লৈ আগবঢ়োৱা হৈছে শ্রেষ্ঠ টাইফাকে ভাষাৰ ছবিৰ সন্মান। একেদৰে অকাহিনী (ননফিচাৰ) শিতানত শ্রেষ্ঠ পৰিচালকৰ সন্মান লাভ কৰিছে শিল্পীকা বৰদলৈয়ে। তেওঁ নিৰ্মাণ কৰা মিজো ভাষাৰ ছবিখনৰ নাম হৈছে 'মাওঃ 'দ্য স্পিৰিট ড্রীম্ছ অব্ চেৰাও'।

 ইফালে 'লেন্টিনা আও- লাইট অন ইষ্টার্ন হৰাইজন'ৰ বাবে সঞ্জীৱ পৰাশৰে লাভ কৰে শ্ৰেষ্ঠ জীৱনীমূলক ছবিৰ বঁটা। উল্লেখযোগ্য যে চাৰিগৰাকী নাৰীৰ সহ্য, ধৈর্য, সাহস আৰু ত্যাগৰ হৃদয় কঁপাই যোৱা এটা তেজে ধোৱা কাহিনীৰ আধাৰত নিৰ্মাণ কৰা হৈছিল 'ৰঙা টাপু ১৯৮২' নামৰ চলচ্চিত্ৰখন। বি আৰ চি চিনে প্রডাকশ্যনে প্রযোজনা কৰা এই ছবিখনৰ পৰিচালক আৰু প্রযোজকলৈ আগবঢ়োৱা হৈছে ৰজত কমল বঁটাৰ লগতে প্রত্যেকলৈ দুই লাখকৈ টকা।

আনহাতে, প্রবাল খাওন্দৰ পৰিচালিত টাইফাকে ভাষাৰ ছবি 'পাই টাং- ষ্টেপ অব্ হ'প'ৰ ছবিখনৰ প্ৰযোজক হৈছে নৱ কুমাৰ ভূঞা। এই ছবিখনৰ পৰিচালক আৰু প্ৰযোজকলৈ ৰজত কমল বঁটাৰ লগতে প্রত্যেকলৈ আগবঢ়োৱা হৈছে দুই লাখকৈ টকা।

আনহাতে, বিশিষ্ট চিত্র সমালোচক উৎপল দত্তই এইবাৰ লাভ কৰিছে শ্রেষ্ঠ সমালোচকৰ ৰাষ্ট্ৰীয় বঁটা। স্বর্ণ কমল বঁটাত আছে এক লাখ টকাসহ এখন মানপত্র। অকাহিনী (ননফিচাৰ) শিতানত শিল্পীকা বৰদলৈৰ মিজো ভাষাৰ 'মাও: দ্য স্পিৰিট ড্রীমছ অব্ চেৰাও'ৱে লাভ কৰা স্বর্ণ কমল বঁটাত আছে এখন মানপত্রসহ তিনি লাখ টকা।