ভাৰতৰ বিৰুদ্ধে জি-৭ৰ দেশক শুল্ক আৰোপৰ আহ্বান

ডিজিটেল ডেস্কঃ ভাৰতীয় সামগ্রীত ৫০ শতাংশ শুল্ক আৰোপৰ পাছতো ক্ষান্ত হোৱা নাই আমেৰিকাৰ ৰাষ্ট্ৰপতি ট্রাম্প বাহিনী। আমেৰিকাই এতিয়া জি-৭ৰ দেশসমূহক ভাৰতৰ বিৰুদ্ধে শুল্ক আৰোপ কৰিবলৈ আহ্বান জনাইছে। 

শুকুৰবাৰে জি-৭দেশৰ বিত্ত মন্ত্ৰীসকলৰ এখন বৈঠক অনুষ্ঠিত হৈছিল, য'ত ৰাছিয়াৰ তেল ক্ৰয় কৰা দেশসমূহৰ বিৰুদ্ধে আৰোপ কৰিবলগা শুল্ক আৰু ৰাছিয়াৰ বিৰুদ্ধে প্রতিবন্ধকতা আৰোপ কৰাৰ বিষয়টোৰ ওপৰত গভীৰভাৱে চর্চা কৰা হয়।

এই বৈঠকখনতে আমেৰিকাই ইয়াৰ মিত্ৰ দেশসমূহক ৰুছ তেল ক্ৰয় কৰা দেশসমূহৰ বিৰুদ্ধে শুল্ক আৰোপৰ বাবে হেঁচা প্রয়োগ কৰে। বর্তমান জি-৭দেশসমূহৰ অধ্যক্ষ হৈ থকা কানাডাই এই তথ্য সদৰী কৰে। কানাডাৰ বিত্ত মন্ত্ৰী ফাঁছৱা-ফিলিপ ছেম্পেনে এই বৈঠকত অধ্যক্ষতা কৰে। ইউক্রেইনৰ বিৰুদ্ধে যুদ্ধ বন্ধ কৰাৰ বাবে ৰাছিয়াৰ ওপৰত হেঁচা বঢ়োৱাৰ বিষয়তো বৈঠকত আলোচনা কৰা হয়। বৈঠকত উপস্থিত থকা আমেৰিকাৰ বিত্ত মন্ত্ৰী স্কট বেছান্ত আৰু বাণিজ্য প্রতিনিধি জেমিছন গ্ৰীৰে কয় যে ৰাছিয়াৰ তেল ক্ৰয় কৰি থকা ভাৰত আৰু চীনৰ বিৰুদ্ধে জি-৭ৰ দেশসমূহে শুল্ক আৰোপ কৰিব লাগে আৰু আমেৰিকাই ভাৰতৰ বিৰুদ্ধে আৰোপ কৰা শুল্কৰ বিষয়ত একমত হ'ব লাগে।

বেছান্তে কয় যে ভাৰত-চীনৰ দৰে দেশে ৰাছিয়াৰ তেল ক্রয় কৰাৰ বাবেই ৰাষ্ট্ৰপতি পুটিনে ইউক্রেইনৰ বিৰুদ্ধে যুদ্ধ চলাই যাব পাৰিছে। আনহাতে, ইউৰোপীয়ান ইউনিয়নকো ভাৰত আৰু চীনৰ সামগ্ৰীত শুল্ক আৰোপ কৰিবলৈ আহ্বান জনাইছিল আমেৰিকাই।

উৎসঃ দৈনিক জনমভূমি