মাজনিশা ভোকাতুৰ শিশুৰ চিৎকাৰে কঁপাইছে গাজা

ডিজিটেল ডেস্ক : গাজাত হামাছৰ বিৰুদ্ধে ইজৰাইলী সেনাই চলাই থকা ভয়ংকৰ যুদ্ধৰ বাবে প্রতিদিনেই বহু পেলেষ্টাইনী লোকৰ মৃত্যু হোৱাৰ মাজতে পৰিলক্ষিত হৈছে অন্য এক মর্মন্তুদ দৃশ্যৰ।

গাজাত বর্তমান সময়ত প্রবল দুর্ভিক্ষ আৰম্ভ হৈছে। খাদ্যৰ অভাৱত হাজাৰ হাজাৰ লোকে অনাহাৰে-অনিদ্রাত নিশা পৰা কৰিছে গাজাত। তীব্র মানৱীয় সংকটৰ সন্মুখীন হৈছে গাজাৰ বাসিন্দাই। ইজৰাইলে গাজালৈ মানৱীয় সাহায্য অহাত প্রতিবন্ধকতা লগোৱাৰ পাছৰে পৰা গাজাৰ মানৱীয় সাহায্য কেন্দ্রসমূহত দৈনিক হাজাৰ হাজাৰ পেলেষ্টাইনীয়ে খাদ্যৰ বাবে অপেক্ষা কৰিব লগা হৈছে। তীব্র খাদ্য সংকটত ভুগি গাজাত এতিয়া দৈনিক বহু মানুহ মৃত্যুমুখত পৰিছে।

ইফালে, গাজাত থকা মানৱীয় খাদ্য বিতৰণ কেন্দ্ৰসমূহ হামাছে নিয়ন্ত্ৰণ কৰা বুলি অভিযোগ কৰি ইজৰাইলী সেনাই দৈনিক এইসমূহত আক্ৰমণ কৰি আছে আৰু দৈনিক বহু লোকক হত্যা কৰি আছে। উত্তৰ গাজাৰ তিনিটা সন্তানৰ পিতৃ আৰু এজন চিকিৎসকে কয় যে তেওঁৰ কণমানি শিশুকেইটাই ভোকৰ তাড়নাত মাজনিশা চিঞৰি উঠে আৰু খাদ্যৰ বাবে হাহাকাৰ কৰে। পেলেষ্টাইনৰ স্বাস্থ্য মন্ত্ৰ্যালয়ৰ বিষয়াই প্রকাশ কৰা মতে, মানর-সৃষ্ট দুর্ভিক্ষৰ এখন কৰুণ ছবি এতিয়া গাজাত দেখা পোৱা যায়। ভোকাতুৰ শিশু-মহিলাসহ বহু পেলেষ্টাইনীয়ে গাজাত খাদ্য কঢ়িয়াই অনা ট্রাকৰ আগত শাৰী পাতি থকা অৱস্থাতে তেওঁলোকক গুলীয়াই হত্যা কৰা হয়। শেহতীয়াকৈ ছেটেলাইটৰ পৰা তোলা ছবিত এই কৰুণ দৃশ্য প্রকাশ পাইছে। খাদ্য কঢ়িয়াই অনা ট্রাকসমূহৰ আগত হাজাৰ হাজাৰ ভোকাতুৰ পেলেষ্টাইনীয়ে দৈনিক খাদ্যৰ বাবে হাহাকাৰ কৰে।

ইতিমধ্যে বিশ্বৰ সংস্থাসমূহে সতর্কবাণী দিছে যে গাজাৰ শিশু-মহিলাৰ ২৫ শতাংশই পুষ্টিহীনতাত ভূগিছে। খাদ্য-ঔষধ অবিহনে হাজাৰ হাজাৰ পেলেষ্টাইনীয়ে নাৰকীয় যন্ত্রণা ভুগিব লগা হৈছে। শেহতীয়াকৈ আমেৰিকাৰ ভূ-বৈজ্ঞানিক প্রতিষ্ঠান প্লেনেট লেবে গাজা স্ত্রীপৰ এই ভয়ংকৰ খাদ্য নাটনিৰ দৃশ্য ছেটেলাইটযোগে সংগ্ৰহ কৰে। সমগ্র গাজাৰ লগতে দক্ষিণৰ খান ইউনুছ আৰু ৰাফাহৰ কৰণ দৃশ্যও এই ছেটেলাইট ইমেজত বন্দী হয়। বর্তমান ৰাষ্ট্ৰসংঘৰ লগতে ব্রিটেইন, কানাডা, ফ্রান্স আদি দেশেও গাজাত এই মানৱীয় সংকটৰ তীব্র প্রতিবাদ কৰিছে আৰু ইজৰাইলক ইয়াৰ বাবে জগৰীয়া কৰিছে।

উৎসঃ দৈনিক জনমভূমি