ডিজিটেল ডেস্কঃ নেপালৰ খোটাং জিলাত বুধবাৰে এক ভয়ংকৰ হেলিকপ্টাৰ দুৰ্ঘটনা সংঘটিত হয়। কাঠমাণ্ডুৰ পৰা উৰা মৰা 'এয়াৰ ডাইনেষ্টি'ৰ (Air Dynasty) এখন হেলিকপ্টাৰ অৱতৰণৰ সময়ত হঠাত্ নিয়ন্ত্ৰণ হেৰুৱাই পথাৰত লুটি খাই পৰে। এই ঘটনাক কেন্দ্ৰ কৰি সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে।
ঘটনাটো জিলাখনৰ বালাবেছি নামৰ অঞ্চলত সংঘটিত হয়। প্ৰাপ্ত তথ্য অনুসৰি, হেলিকপ্টাৰখনৰ পাইলটে এখন মুকলি পথাৰত অৱতৰণ কৰাৰ চেষ্টা কৰিছিল। কিন্তু অৱতৰণৰ ঠিক আগমুহূৰ্তত বাহনখনে ভাৰসাম্য হেৰুৱায় আৰু ইয়াৰ পিছফালটো কাষৰে পাহাৰত খুন্দা খাই লুটি খাই পৰে।
এটা পৰিয়ালৰ ৫ সদস্যৰ যাত্ৰা
উক্ত হেলিকপ্টাৰখনত একেটা পৰিয়ালৰে ৫ জন সদস্য আছিল। তেওঁলোকে এজন আত্মীয়ৰ অন্ত্যেষ্টিক্ৰিয়াত অংশগ্ৰহণ কৰিবলৈ কাঠমাণ্ডুৰ পৰা খোটাঙলৈ গৈ আছিল। নেপাল অসামৰিক বিমান পৰিবহন কৰ্তৃপক্ষৰ মতে, হেলিকপ্টাৰখন পুৱা প্ৰায় ১১ বজাত কাঠমাণ্ডুৰ পৰা ৰাওনা হৈছিল।
সৌভাগ্যক্ৰমে, ইমান ডাঙৰ দুৰ্ঘটনা হোৱাৰ পিছতো হেলিকপ্টাৰখনত থকা কোনো যাত্ৰীৰে প্ৰাণহানি হোৱা নাই। সকলো যাত্ৰী আৰু চালক দলৰ সদস্য সুৰক্ষিত আছে। কেৱল এজন যাত্ৰী সামান্য পৰিমাণে আঘাতপ্ৰাপ্ত হৈছে, যাক উন্নত চিকিৎসাৰ বাবে পুনৰ কাঠমাণ্ডুলৈ প্ৰেৰণ কৰা হৈছে।
দুৰ্ঘটনাৰ সম্ভাব্য কাৰণ
প্ৰাথমিক তদন্তৰ ভিত্তিত ধাৰণা কৰা হৈছে যে পাহাৰীয়া অঞ্চলত হঠাত্ অহা বতাহৰ বেগে হেলিকপ্টাৰখনৰ ভাৰসাম্য নষ্ট কৰিব পাৰে। অৱতৰণৰ সময়ত হেলিকপ্টাৰৰ পাংখাৰ পৰা উৎপন্ন হোৱা ধূলিয়ে পাইলটৰ দৃষ্টিশক্তি বাধাগ্রস্ত কৰাৰ ফলতো এই ঘটনা ঘটিব পাৰে বুলি বিশেষজ্ঞসকলে সন্দেহ প্ৰকাশ কৰিছে।
ঘটনাৰ পাছতে স্থানীয় লোকসকলে তৎপৰতাৰে উদ্ধাৰ অভিযানত সহায় কৰে। জিলা প্ৰশাসনে ঘটনাটো নিশ্চিত কৰিছে আৰু ইয়াৰ এক উচ্চস্তৰীয় তদন্তৰ নিৰ্দেশ দিছে। ইতিমধ্যে দুৰ্ঘটনাটোৰ এক ভিডিঅ’ ছচিয়েল মিডিয়াত ভাইৰেল হৈ পৰিছে, য’ত হেলিকপ্টাৰখন অৱতৰণৰ মুহূৰ্তত খহি পৰা দেখা গৈছে।
Continue Reading
