ডিজিটেল ডেস্ক: চণ্ডীগড়ৰ ব্যস্ততাপূৰ্ণ ৯ নং ছেক্টৰত আজি এক ভয়ংকৰ হত্যাকাণ্ডৰ ঘটনা সংঘটিত হয়। দিনদুপৰতে এদল দুৰ্বৃত্তই এজন প্ৰপাৰ্টী ডিলাৰক অতি ওচৰৰ পৰা গুলীয়াই দিয়ে। মৃত যুৱকজনক চৰণপ্ৰীত সিং বুলি চিনাক্ত কৰা হৈছে।
প্ৰত্যক্ষদৰ্শীৰ মতে, চৰণপ্ৰীত সিঙে ছেক্টৰ ৯ত থকা এটা জিমত ব্যায়াম কৰি ওলাই অহাৰ সময়তে এই আক্ৰমণৰ বলি হয়। তেওঁ বাহিৰলৈ ওলাই অহাৰ লগে লগে মটৰ চাইকেলত অহা অচিনাক্ত দুৰ্বৃত্তই তেওঁক লক্ষ্য কৰি ধাৰাসাৰ গুলীবৰ্ষণ আৰম্ভ কৰে। জানিব পৰা মতে, আক্ৰমণকাৰীয়ে প্ৰায় ১০ ৰ পৰা ১২ জাঁই গুলী চলাইছিল।
গুলীবিদ্ধ হোৱাৰ লগে লগে চৰণপ্ৰীতক সংকটজনক অৱস্থাত চণ্ডীগড়ৰ পিজিআই (PGI) হাস্পতাললৈ লৈ যোৱা হয় যদিও চিকিৎসকে তেওঁক মৃত ঘোষণা কৰে।
আৰক্ষীৰ প্ৰাথমিক তদন্ত:
মৃত চৰণপ্ৰীত বৃত্তিগতভাৱে এজন প্ৰপাৰ্টী ডিলাৰ আছিল।ঘটনাৰ আঁৰত কোনো অপৰাধী চক্ৰ বা গেঙৰ হাত থকাৰ সন্দেহ কৰা হৈছে। জানিব পৰা মতে, ইয়াৰ পূৰ্বেও তেওঁলৈ এটা গেঙৰ পৰা মৃত্যুৰ ভাবুকি আহিছিল।
বৰ্তমান আৰক্ষীয়ে সমগ্ৰ অঞ্চলটো ঘেৰি ধৰিছে আৰু চিচিটিভি (CCTV) ফুটেজৰ সহায়ত অভিযুক্তক কৰায়ত্ত কৰিবলৈ তদন্ত ক্ষিপ্ৰতৰ কৰি তুলিছে।
Continue Reading
