প্ৰথম ইনিংছত ভাৰতৰ ৩৫৮ ৰান

ডিজিটেল ডেস্ক : সোঁ ভৰিৰ আঙুলি ভঙা সত্ত্বেও বেটিং কৰিবলৈ অহা ঋষভ পণ্টৰ সাহসী অর্ধ-শতৰানৰ সহায়ত ভাৰতে বৃহস্পতিবাৰে ইংলেণ্ডৰ বিৰুদ্ধে চতুর্থখন টেষ্টত ৩৫৮ ৰানত প্রথম ইনিংছ সামৰে।

আঘাতৰ বাবে প্ৰথম দিনা ৩৭ ৰানত অৱসৰ লোৱা পন্টে বৃহস্পতিবাৰে দ্বিতীয় দিনা মুঠ ৭৫টা বলত ৫৪ ৰান কৰি আউট হয়। দলীয় স্ক'ৰ ৬ উইকেটত ৩১৪ ৰানত ছাৰ্দুল ঠাকুৰ (৪১) পেভিলিয়নলৈ উভতি যোৱাৰ সময়তে বেট ধৰিবলৈ অহা পন্টে তিনিটা চাৰি আৰু দুটা ছয়েৰে নিজৰ অর্ধ-শতৰানৰ ইনিংছটো সজায়।

তাৰ আগেয়ে ভাৰতে আগদিনাৰ স্ক'ৰ ৪ উইকেটত ২৬৪ ৰানৰ পৰা খেল আৰম্ভ কৰি প্ৰথমেই হেৰুৱাই ৰবীন্দ্ৰ জাদেজাৰ উইকেট। প্রথম দিনা ১৯ ৰানত বেট ধৰি থকা জাদেজাই কালি মাথোঁ ১ ৰান যোগ দি জুফ্রা আৰ্চাৰৰ বলত আউট হয়। ইয়াৰ পাছত ছাৰ্দুল ঠাকুৰ (৪১) আৰু ৱাশ্বিংটন সুন্দৰে ষষ্ঠ উইকেটত ৪৮ ৰানৰ যুটি বান্ধে। ৱাশ্বিংটনে ২৭ৰান কৰি বিদায় লয়। টেষ্টত অভিষেক ঘটোৱা অনছুল কমবুজে কোনো ৰান নকৰাকৈ আউট হোৱাৰ পাছত পণ্টে দলীয় স্ক'ৰ ৩৪৯ ৰানত ক্রিজ এৰে।

যশপ্রীত বুমৰাহে ৪ ৰানত আউট হোৱাত মহম্মদ ছিৰাজে ৫ ৰানত আউট নোহোৱাকৈ থাকে। ইংলেণ্ডৰ হৈ বেন ষ্টোকছে সর্বাধিক ৫টা আৰু আর্চাৰে তিনিটা উইকেট দখল কৰে। প্ৰত্যুত্তৰত ইংলেণ্ডে জাক ক্রলী (৮৪) আৰু বেন ডাকেটৰ (৯৪) বেটিং বিক্ৰমেৰে প্ৰথম ইনিংছত সংগ্ৰহ কৰিছে দুই উইকেটত ২২৫ ৰান। দ্বিতীয় দিনৰ সামৰণিত অলি পপে ২০ আৰু জু ৰোটে ১১ ৰানত বেট ধৰি থাকে।

উৎসঃ দৈনিক জনমভূমি