আই চি চি মহিলা বিশ্ব কাপত ক্রমশঃ দ্বিতীয়টো পৰাজয়ৰ সন্মুখীন ভাৰতৰ

ডিজিটেল ডেস্ক : ভাৰতে চলিত আই চি চি মহিলা বিশ্ব কাপত ক্রমশঃ দ্বিতীয়টো পৰাজয়ৰ সন্মুখীন হৈছে। প্রথমে দক্ষিণ আফ্ৰিকাৰ পাছত এইবাৰ অষ্ট্ৰেলিয়াৰ হাতত পৰাজয়বৰণ কৰে ভাৰতে।

কালি অনুষ্ঠিত খেলত ভাৰতক তিনি উইকেটত হৰুৱায় অষ্ট্ৰেলিয়াই। প্রথমে বেট ধৰি ভাৰতে ৩৩০ ৰান কৰিছিল। প্রত্যুত্তৰত অষ্ট্ৰেলিয়াই এলিছা হেলীৰ (১৪২) দুৰন্ত শতৰানৰ সহায়ত এটা অ'ভাৰ বাকী থকা অৱস্থাত ৭টা উইকেট হেৰুৱাই ৩৩১ ৰান কৰি জয়লাভ কৰে। 

ইয়াৰ আগেয়ে মহিলাৰ এদিনীয়া আন্তজাৰ্তিকত এক কেলেণ্ডাৰ বৰ্ষত ১০০০ ৰান পূৰ কৰা স্মৃতি মান্ধানাৰ (৮০) বেটিং বিক্ৰমৰ সহায়ত ভাৰতে প্রথমে বেট ধৰি ৪৮.৫ অ'ভাৰত ৩৩০ ৰান কৰিছিল। অ'পেনাৰদ্বয় মান্ধানা আৰু প্ৰতীকা ৰাৱালে (৭৫) প্রথম উইকেটত ১৫৫ ৰানৰ যুটি বান্ধি ভাৰতৰ বাবে ভাল আৰম্ভণি কৰিছিল। 

বেটিং অৰ্ডাৰৰ শেষৰ ফালে হার্লিন দেওল (৩৮), হৰমনপ্রীত কৌৰ (২২), জেমিমা ৰড্রিগুৱেজ (৩৩) আৰু ৰিচা ঘোষে (৩২) উপযোগী বৰঙনি আগবঢ়ায়। অষ্ট্ৰেলিয়াৰ হৈ আনাবেল ছাডাৰলেণ্ডে ৫টা আৰু ছোফী মলিনিউকছে তিনিটা উইকেট লাভ কৰে।

উৎসঃ দৈনিক জনমভূমি