পাকিস্তানে পুনৰ নিৰ্মাণ কৰিছে সন্ত্রাসবাদীৰ ঘাটি

ডিজিটেল ডেস্ক : 'অপাৰেশ্যন সেন্দূৰ'ৰ সময়ত ভাৰতীয় সেনাই যোৱা ৭ মে'ত পাকিস্তানত থকা সন্ত্রাসবাদীৰ ৯টা ঘাটি ধ্বংস কৰে।

কিন্তু পাকিস্তানী চৰকাৰ আৰু সেনাৰ সহযোগত এই ঘাটিবোৰৰ ক্ষিপ্ৰতাৰে মেৰামতি তথা পুনৰ নিৰ্মাণকার্য চলাই থকা হৈছে। এই ঘাটিবোৰৰ মেৰামতিৰ বাবে পাকিস্তান চৰকাৰে প্ৰায় ১০০ কোটি টকাৰ পুঁজি ধাৰ্য কৰে। ইতিমধ্যে লস্কৰ-ই-টয়বা আৰু জৈছ-ই-মহম্মদৰ দৰে সন্ত্রাসবাদী সংগঠনে পৰিচালনা কৰা মাদ্ৰাছাসমূহলৈ পুনৰ ছাত্ৰ যাবলৈ লৈছে। এই ঘাটিসমূহৰ মেৰামতিৰ কামত ইতিমধ্যে ৫০ কোটি টকা মোকলাই দিয়া হৈছে।

সূত্ৰসমূহে প্রকাশ কৰা অনুসৰি ধাৰত পোত যোৱা পাকিস্তানে শেহতীয়াকৈ আই এম এফৰ পৰা ১২ হাজাৰ কোটি টকা আৰু এ ডি বিৰ পৰা সাত হাজাৰ কোটি টকাৰ ঋণ লয়। এই ঋণৰ এটা অংশ সন্ত্রাসবাদীৰ ঘাটি মেৰামতি তথা পুনৰ নিৰ্মাণত ব্যয় কৰাৰ বাবে মোকলাই দিয়ে। মুজফ্ফৰবাদৰ আব্বাছ মছজিদৰ পুনৰ নিৰ্মাণতো আই এম এফ আৰু এ ডি বিৰ পৰা ঋণৰ ধন ব্যয় কৰা হৈছে। অৱশ্যে পাকিস্তান চৰকাৰ আৰু সেনাই সন্ত্রাসবাদীৰ ঘাটিসমূহৰ মেৰামতিত ব্যয় কৰা ধনৰ উৎসৰ বিষয়ে প্রকাশ কৰিবলৈ অস্বীকাৰ কৰিছে। ভাৰতীয় সেনাৰ আক্ৰমণত পাকিস্তান অধিকৃত কাশ্মীৰৰ মুজাফ্ফৰবাদত থকা সন্ত্রাসবাদীৰ লঞ্চ পেড তথা মাদ্ৰাছাসমূহৰ লগতে কোটলী আৰু ভিম্বৰত থকা লঞ্চ পেড তথা মাদ্ৰাছাৰ মেৰামতি তথা পুনৰ নিৰ্মাণৰ কাৰণে ৪০ কোটি টকা দিয়া হৈছে। এই স্থানসমূহ হৈছে জৈছ-ই-মহম্মদৰ ঘাটি।

আনহাতে লস্কৰ-ই-টয়বাৰ মুৰিদকেত থকা ঘাটি, জৈছৰ বহাৱলপুৰত থকা মুখ্য কার্যালয়, পঞ্জাব আৰু শিয়ালকোটত থকা সন্ত্রাসবাদীৰ ঘাটি মেৰামতিৰ কাৰণে পাকিস্তান চৰকাৰে ৬০ কোটি টকা মঞ্জুৰ কৰে। বহাৱলপুৰৰ ছুভান আল্লা মছজিদে পৰিচালনা কৰা মাদ্ৰাছালৈ ১২ হাজাৰ তথা মুৰিদকেৰ মাদ্ৰাছালৈ ছয় হাজাৰ ছাত্ৰ উভতি আহে। পাকিস্তান চৰকাৰে সন্ত্রাসবাদীৰ ঘাটিসমূহৰ মেৰামতিৰ বাবে চীনৰ গেঝোউবা গ্ৰুপৰ কোম্পানীৰ সৈতেও যোগাযোগ কৰে। পাকিস্তানী সেনাৰ ফিল্ড মাৰ্শ্বাল জেনেৰেল আছিম মুনিৰে সন্ত্রাসবাদীৰ ঘাটি মেৰামতিৰ বাবে পাকিস্তানী সেনাৰ কল্যাণমূলক আঁচনি আৰু গৃহ নির্মাণ আঁচনিৰ ধনো হস্তান্তৰ কৰাৰ নির্দেশ দিয়ে।

উৎসঃ দৈনিক জনমভূমি