শীঘ্ৰে প্রস্তুত হৈ উঠিব কেঞ্চাৰৰ ভেকচিন

ডিজিটেল ডেস্ক : কেঞ্চাৰ ৰোগৰ ভেকচিনক লৈ বিজ্ঞানীসকলে শেহতীয়াকৈ কৰা এক গৱেষণাই এতিয়া সমগ্ৰ বিশ্বৰ বাবে আশাৰ বতৰা কঢ়িয়াই আনিছে। আমেৰিকাৰ ফ্লৰিডা বিশ্ববিদ্যালয়ৰ বিজ্ঞানীসকলে প্রস্তুত কৰা এই ভেকচিনে বিশ্বৰ পৰা কেঞ্চাৰ ৰোগ নোহোৱা কৰাত সহায় কৰিব বুলি কোৱা হৈছে। বিশ্ববিদ্যালয়খনৰ বিজ্ঞানীসকলে এম আৰ এন এ ভেকচিন প্রস্তুত কৰি উলিয়াইছে।

এই ভেকচিনে শৰীৰত টিউমাৰৰ বিৰুদ্ধে প্ৰতিৰক্ষা প্ৰতিক্রিয়া বৃদ্ধি কৰাত সহায় কৰে। অৱশ্যে মানৱ শৰীৰত এই ভেকচিনৰ প্ৰতিক্ৰিয়াৰ বিষয়ে এতিয়ালৈকে স্পষ্ট হোৱা নাই, কিন্তু বিজ্ঞানীসকলৰ শেহতীয়া পৰীক্ষাই এই দিশত আশাৰ বতৰা দিছে। এই গৱেষণাৰ এখন প্ৰতিবেদন প্রকাশ পাইছে নেচাৰ বায়' মেডিকেল ইঞ্জিনীয়াৰিং নামক বিজ্ঞান বার্তালোচনীখনত।

ইয়াত প্রকাশ পোৱা মতে, ভেকচিনবিধৰ পৰীক্ষা কৰা হৈছিল নিগনিৰ দেহত। এই ভেকচিন এমিউন চেকপইন্ট ইনহিবিটৰ ইমিউন'থেৰাপী ঔষধৰ সৈতে নিগনিৰ শৰীৰত প্ৰয়োগ কৰা হৈছিল। এই ঔষধৰ সৈতে এই ভেকচিন দিয়াৰ পাছত নিগনিৰ শৰীৰত টিউমাৰ প্ৰতিৰোধী প্রভাৱ দেখিবলৈ পোৱা গৈছে। এই ভেকচিনৰ বিশেষত্ব হ'ল ই কোনো বিশেষ টিউমাৰ প্ৰটিনক লক্ষ্য কৰি নলয়। ইয়াৰ পৰিৱৰ্তে কেঞ্চাৰৰ বিৰুদ্ধে প্ৰতিৰক্ষা প্ৰণালী শক্তিশালী কৰি তোলে। নিগনিৰ শৰীৰত কৰা পৰীক্ষা সফল হোৱাৰ পাছত এতিয়া এই ভেকচিনৰ মানৱ শৰীৰত প্ৰয়োগ কৰি পৰীক্ষা কৰা হ'ব।

ইউ এফ হেল্থৰ অংকল'জিষ্ট তথা মুখ্য গৱেষক ড° এলিয়াছ ছয়ুৰে এই ভেকচিন উদ্ভাৱন কৰা প্ৰসংগত কয় যে ইয়াৰ জৰিয়তে অস্ত্রোপচাৰ, ৰেডিয়েশ্যন বা কেম' থেৰাপীক নিৰ্ভৰ নকৰাকৈ কেঞ্চাৰৰ চিকিৎসা কৰাৰ নতুন প্রণালী উপলব্ধ হোৱাৰ সম্ভৱনা আছে। যদি মানৱ শৰীৰত এই ভেকচিনৰ পৰীক্ষা সফল হয় তেতিয়া কেঞ্চাৰৰ ভেকচিন তৈয়াৰ কৰাৰ পথ প্রশস্ত হৈ পৰিব। ফলত এই দুৰাৰোগ্য ৰোগৰ পৰা মুক্তি পোৱাৰ পথো সুগম হৈ পৰিব।

ছয়ুৰৰ মতে, নিগনিক লৈ কৰা পৰীক্ষাত অভাৱনীয় ফল পোৱা গৈছে। এই ভেকচিন কোনো বিশেষ ধৰণৰ টিউমাৰক লৈ নহয়। আন কথাত সকলো ধৰণৰ টিউমাৰ প্ৰতিৰোধ কৰাত ই সহায় কৰিব। এই ভেকচিনে যিকোনো ধৰণৰ কেঞ্চাৰৰ টিউমাৰৰ বিৰুদ্ধে শৰীৰত প্ৰতিৰক্ষা প্ৰণালী শক্তিশালী কৰি তুলিব।

উৎসঃ দৈনিক জনমভূমি