২০ বছৰে ক’মাত থকাৰ পাছত অৱশেষত মৃত্যুক সাবটিলে 'স্লিপিং প্ৰিন্স' নামেৰে জনাজাত যুৱকজনে

ডিজিটেল ডেস্ক : ২০ বছৰে ক’মাত থকাৰ পাছত অৱশেষত এজন যুৱকে সাবটিলে কৰুণ মৃত্যুক।  ছৌদি আৰৱৰ 'স্লিপিং প্ৰিন্স' নামেৰে জনাজাত আল ৱালিদ বিন খালিদ নামৰ যুৱকজনৰ ৩৫ বছৰ বয়সত মৃত্যু হৈছে। ২০০৫ চনত লণ্ডনত সংঘটিত হোৱা গাড়ী দুৰ্ঘটনাৰ পিছত যোৱা ২০ বছৰ ধৰি ক’মাত আছিল যুৱকজন। ১৯৯০ চনৰ এপ্ৰিল মাহত তেওঁ জন্মগ্ৰহণ কৰিছিল।

আল ৱালিদ আছিল ছৌদি আৰৱৰ ৰাজপৰিয়ালৰ সদস্য ৰাজকুমাৰ খালিদ বিন তালাল আল ছাউদৰ জ্যেষ্ঠ পুত্ৰ আৰু কোটিপতি ৰাজকুমাৰ আল ৱালিদ বিন তালালৰ ভতিজা। ১৫ বছৰ বয়সত ব্ৰিটেইনৰ এখন সামৰিক মহাবিদ্যালয়ত পঢ়ি থকাৰ সময়তে তেওঁ এক ভয়ংকৰ পথ দুৰ্ঘটনাত পতিত হয় যাৰ ফলত তেওঁৰ মূৰত গুৰুতৰভাৱে আঘাতপ্ৰাপ্ত হয় আৰু আভ্যন্তৰীণ ৰক্তক্ষৰণ হয় আৰু তেতিয়াৰ পৰাই তেওঁ ক’মাত থাকে।

ৰাজকুমাৰ ৱালিদ বিন খালিদক আমেৰিকা আৰু স্পেইনৰ বিশেষজ্ঞৰ দ্বাৰা চিকিৎসা কৰা হৈছিল যদিও তেওঁ কেতিয়াও সম্পূৰ্ণ চেতনা ঘূৰাই পোৱা নাছিল। দুৰ্ঘটনাৰ পিছত তেওঁক ৰিয়াদৰ কিং আব্দুলজিজ মেডিকেল চিটিলৈ লৈ যোৱা হয় আৰু প্ৰায় দুটা দশক ধৰি তেওঁ অহৰহ চিকিৎসা সেৱাৰ অধীনত লাইফ চাপৰ্ট চিষ্টেমত থাকে।

ৰাজকুমাৰ ৱালিদে যোৱা ২০ বছৰ ক’মাত কটায়। কিন্তু মাজে মাজে তেওঁৰ শৰীৰৰ অংগী ভংগীয়ে আশাৰ ৰেঙণি দেখুৱাইছিল আৰু এই কাৰণেই তেওঁৰ পিতৃ ৰাজকুমাৰ খালিদ বিন তালালে লাইফ চাপোৰ্ট ব্যৱস্থাক আঁতৰোৱাৰ পৰামৰ্শ ৰাজহুৱাভাৱে নাকচ কৰিছিল। ঈশ্বৰৰ ওপৰত বিশ্বাস ৰাখি তেওঁ পুত্ৰৰ চিকিৎসা কৰি থাকিল। তেওঁ আশা কৰিছিল যে এদিন তেওঁৰ ল’ৰাটো নিশ্চয় ভাল হ’ব।

কিন্তু সকলোকে কন্দুৱাই তেওঁ অৱশেষত মৃত্যুক আঁকোৱালি লয়। তেওঁৰ মৃত্যু নিশ্চিত কৰি ৰাজকুমাৰ খালিদে এক বিবৃতিত কয় যে, “আল্লাহৰ দয়াত আমাৰ মৰমৰ পুত্ৰই অৱশেষত সকলো দুখ-কষ্টৰ পৰা মুক্তি পালে। আল্লাহে তেওঁৰ আত্মাক কৃপা কৰক।''