আৰাৱলী পৰ্বতলৈ 'ডেথ ৱাৰেণ্ট', মোদী চৰকাৰৰ বিৰুদ্ধে কংগ্ৰেছৰ জ্যেষ্ঠ নেত্রী ছোনিয়া গান্ধীৰ গুৰুতৰ অভিযোগ

ডিজিটেল ডেস্ক : প্রধানমন্ত্রী নৰেন্দ্ৰ মোদীৰ কেন্দ্ৰীয় চৰকাৰে আৰাৱলী পৰ্বতমালাৰ বাবে 'ডেথ ৱাৰেণ্ট' আনিছে। এই মন্তব্য কৰিছে কংগ্রেছ সংসদীয় দলৰ নেত্রী ছোনিয়া গান্ধীয়ে। 

কংগ্ৰেছৰ জ্যেষ্ঠ নেত্ৰীগৰাকীয়ে ৰাষ্ট্ৰীয় বাতৰিকাকত 'দ্য হিন্দু'ৰ এটা বাতৰিৰ উদ্ধৃতি দি বুধবাৰে কয় যে আৰাৱলী পৰ্বতৰ ১০০ মিটাৰতকৈ কম উচ্চতাৰ এলেকাবোৰৰ যিকোনো অঞ্চলতে খননৰ অনুমতি দিছে কেন্দ্ৰীয় চৰকাৰে। ছোনিয়া গান্ধীয়ে কয় যে গুজৰাটৰ পৰা ধৰি ৰাজস্থান আৰু হাৰিয়ানালৈকে ব্যাপি থকা আৰাৱলী পর্বতমালাই বছৰ বছৰ ধৰি ভাৰতীয় ভৌগোলিক ইতিহাসত গুৰুত্বপূর্ণ ভূমিকা পালন কৰি আহিছে। 

মোদী চৰকাৰে ইতিমধ্যে অবৈধ খননত বিধ্বস্ত হোৱা আৰাৱলী পর্বতত খননৰ অনুমতি দি পর্বতমালা এলেকাটোৰ বাবে মৃত্যুৰ বাতৰি কঢ়িয়াই আনিছে বুলি ছোনিয়া গান্ধীয়ে অভিযোগ কৰে। ছোনিয়াই কয় যে চৰকাৰে ঘোষণা কৰিছে ১০০ মিটাৰতকৈ কম উচ্চতাৰ এলেকাবোৰত খননত বাধা নাই। এই সিদ্ধান্তই অবৈধ খননকাৰী আৰু মাফিয়াবোৰক খননৰ বাবে মুকলি নিমন্ত্রণ জনোৱা হৈছে বুলি গান্ধীয়ে আক্ষেপ কৰে। 

কংগ্ৰেছৰ নেত্ৰীগৰাকীয়ে অভিযোগ কৰে যে চৰকাৰী নীতি নির্ধাৰণত পৰিৱেশৰ প্ৰতি গুৰুতৰভাবে উপেক্ষা কৰা হৈছে। ৰাষ্ট্ৰীয় সেউজ ন্যায়াধিকৰণকো চৰকাৰে দুর্বল কৰি পেলাই ছে বুলি গান্ধীয়ে দাবী কৰে। ছোনিয়া গান্ধীয়ে কয় যে পৰিৱেশ সম্বন্ধীয় বিষয়ত আন্তঃচৰকাৰী সমন্বয় ব্যৱস্থাৰ সৈতে কেন্দ্রীয় চৰকাৰে কাম কৰিব লাগে। দিল্লী আৰু এন চি আৰৰ ভয়াৱহ প্ৰদূষণৰ বিষয়টোও উল্লেখ কৰে ছোনিয়া গান্ধীয়ে।

উৎসঃ দৈনিক জনমভূমি