১৬ বছৰৰ তলৰ শিশুৰ বাবে ছ’চিয়েল মিডিয়া নিষিদ্ধ: কৰ্ণাটক চৰকাৰৰ ডাঙৰ সিদ্ধান্ত

ডিজিটেল ডেস্কঃ কৰ্ণাটক চৰকাৰে ৰাজ্যখনৰ শিশুসকলৰ বাবে এক ঐতিহাসিক আৰু কঠোৰ পদক্ষেপ গ্ৰহণ কৰিছে।

১৬ বছৰৰ তলৰ শিশুৰ বাবে ছ’চিয়েল মিডিয়াৰ ব্যৱহাৰ সম্পূৰ্ণৰূপে নিষিদ্ধ কৰাৰ কথা ঘোষণা কৰিছে মুখ্যমন্ত্রী সিদ্দাৰামাইয়াই। আজি ৰাজ্যিক বাজেট উত্থাপন কৰাৰ সময়ত মুখ্যমন্ত্ৰীগৰাকীয়ে এই গুৰুত্বপূৰ্ণ ঘোষণাটো কৰে।

মুখ্যমন্ত্ৰীয়ে জানিবলৈ দিয়ে যে শিশুসকলৰ মাজত মোবাইল ফোন আৰু ছ’চিয়েল মিডিয়াৰ বৰ্ধিত আসক্তিৰ বিৰূপ প্ৰভাৱ ৰোধ কৰিবলৈ চৰকাৰে এই সিদ্ধান্ত লৈছে। তেওঁৰ মতে সামাজিক মাধ্যমৰ অতিমাত্ৰা ব্যৱহাৰে শিশুৰ মানসিক স্বাস্থ্যৰ ক্ষতি কৰিছে। অনলাইন গেমিং আৰু চুটি ভিডিঅ’ৰ নিচাই ছাত্ৰ-ছাত্ৰীৰ পঢ়া-শুনাত ব্যাঘাত জন্মাইছে। মোবাইলৰ পৃথিৱীতে আৱদ্ধ হৈ থকাৰ বাবে শিশুৰ শাৰীৰিক পৰিশ্ৰম আৰু খেল-ধেমালি কমি আহিছে।

এই নিষেধাজ্ঞা ঘোষণা কৰাৰ পূৰ্বে মুখ্যমন্ত্ৰীয়ে বেংগালুৰুত আয়োজিত উপাচাৰ্য সন্মিলনত বিভিন্ন শিক্ষা বিশেষজ্ঞৰ সৈতে এই বিষয়ত মত বিনিময় কৰিছিল। বিশেষজ্ঞসকলৰ পৰামৰ্শ আৰু বৰ্তমানৰ সামাজিক পৰিস্থিতিৰ প্ৰতি লক্ষ্য ৰাখি চৰকাৰে এই আইনী পদক্ষেপ হাতত লৈছে।

বাজেট ভাষণত মুখ্যমন্ত্ৰীয়ে স্পষ্ট কৰি দিয়ে যে শিশুসকলক ছ’চিয়েল মিডিয়াৰ কুফলৰ পৰা ৰক্ষা কৰিবলৈ চৰকাৰে কঠোৰ নীতি-নিৰ্দেশনা প্ৰস্তুত কৰিছে। এই সিদ্ধান্তই ৰাজ্যখনৰ লাখ লাখ কিশোৰ-কিশোৰীৰ জীৱনশৈলীত প্ৰভাৱ পেলাব বুলি ধাৰণা কৰা হৈছে।