পুত্ৰৰ অপৰাধ ঢাকিবলৈ ডকাইতিৰ নাটক: মীৰাটত পিতৃ-মাতৃসহ পুত্ৰ গ্ৰেপ্তাৰ

ডিজিটেল ডেস্কঃ উত্তৰ প্ৰদেশৰ মীৰাট জিলাৰ পৰীক্ষিতগড় থানাৰ অন্তৰ্গত সৌন্দত গাঁৱত এক চাঞ্চল্যকৰ ঘটনা পোহৰলৈ আহিছে। এজন পুত্ৰৰ অপৰাধ ঢাকিবলৈ মাক-দেউতাকে ৰচনা কৰা ৩৭ লাখ টকাৰ ডকাইতিৰ মিছা কাহিনীৰ পৰিণতিত এতিয়া গোটেই পৰিয়ালটোৱে ৰঙাঘৰৰ আলহী হ'ল।

যোৱা বৃহস্পতিবাৰে নিশা প্ৰায় ২:৩০ বজাত সৌন্দত গাঁৱৰ বাসিন্দা ইছৰাৰ আহমেদৰ পত্নী আনোৱাৰী খাতুনে (৭২) আৰক্ষীক এক ভয়ংকৰ ডকাইতিৰ খবৰ দিয়ে। তেওঁৰ অভিযোগ অনুসৰি, পাঁচজন সশস্ত্ৰ দুৰ্বৃত্তই দেৱাল বগাই তেওঁলোকৰ ঘৰত প্ৰৱেশ কৰিছিল। দুৰ্বৃত্তৰ দলটোৱে আলমাৰিৰ পৰা ১৭ লাখ টকা নগদ আৰু প্ৰায় ২০ লাখ টকাৰ সোণ-ৰূপৰ অলংকাৰ লুটি লৈ যায় বুলি তেওঁ দাবী কৰিছিল। আনকি বাধা দিবলৈ যাওঁতে তেওঁক মাৰপিট কৰা হৈছিল বুলিও তেওঁ কান্দি কান্দি আৰক্ষীক জনাইছিল।

আৰক্ষীৰ তদন্তত ওলাল ওলোটা তথ্য

ঘটনাৰ গুৰুত্ব বুজি জিলা আৰক্ষীয়ে চাৰিটা বিশেষ দল গঠন কৰি তদন্ত আৰম্ভ কৰে। কিন্তু তদন্তকাৰী বিষয়াসকলে কিছুমান বিসংগতি লক্ষ্য কৰে:

গাঁৱৰ কোনো চিচিটিভি কেমেৰাত সেই নিশা কোনো সন্দেহজনক লোকৰ চলাচল ধৰা পৰা নাছিল। ডকাইতি হোৱা বুলি কোৱা কোঠাটোৰ দুৱাৰ ভিতৰৰ পৰা বন্ধ আছিল, যাৰ ফলত বাহিৰৰ পৰা কোনো সোমোৱাটো অসম্ভৱ আছিল।

মাতৃৰ স্বীকাৰোক্তি আৰু পুত্ৰৰ কুকাণ্ড

আৰক্ষীৰ কঠোৰ সোধা-পোছাৰ সন্মুখত অৱশেষত আনোৱাৰী খাতুনে সকলো সঁচা কথা স্বীকাৰ কৰে। দৰাচলতে, তেওঁৰ সৰু পুত্ৰ আব্দুল ওৱাহিদ অনলাইন জুৱা আৰু বেটিং খেলৰ নিচাত আসক্ত আছিল। ওৱাহিদে ঘৰৰ আলমাৰিৰ পৰা নগদ ধন আৰু গহনা উলিয়াই জুৱাত লগাই সকলো হেৰুৱাইছিল।

পুত্ৰক আৰক্ষী বা সমাজৰ চকুৰ পৰা ৰক্ষা কৰিবলৈ মাতৃয়ে এই ডকাইতিৰ নাটক ৰচনা কৰিছিল। পিতৃ ইছৰাৰ আহমেদেও এই সমগ্ৰ পৰিকল্পনাত পত্নীক সহায় কৰিছিল।

মীৰাট আৰক্ষীয়ে জনোৱা মতে, মিছা তথ্যৰে আৰক্ষীক বিপথে পৰিচালিত কৰা আৰু অপৰাধ লুকুওৱাৰ অভিযোগত পিতৃ-মাতৃ আৰু পুত্ৰ— তিনিওজনকে গ্ৰেপ্তাৰ কৰা হৈছে। বৰ্তমান তেওঁলোকক ন্যায়িক জিম্মালৈ প্ৰেৰণ কৰা হৈছে।