মানৱীয়তাৰ চৰম পতন: দুয়োটা কিডনী বিকল হোৱা স্বামীক শ্মশানত এৰি থৈ গ’ল পত্নীয়ে

ডিজিটেল ডেস্কঃ আজিৰ যান্ত্ৰিক যুগত মানৱীয় প্ৰমূল্যবোধ কিমান তললৈ নামিব পাৰে, তাৰে এক জলন্ত নিদৰ্শন দাঙি ধৰিলে তেলেংগানাৰ জগতীয়াল চহৰৰ এক মৰ্মান্তিক ঘটনাই।

যি সময়ত এজন অসুস্থ ব্যক্তিক আপোনজনৰ সাহস আৰু সহায়ৰ আটাইতকৈ বেছি প্ৰয়োজন হয়, তেনে এক সংকটপূৰ্ণ সময়তে এগৰাকী মহিলাই তেওঁৰ দুয়োটা কিডনী বিকল হোৱা স্বামীক এখন শ্মশানত অসহায় অৱস্থাত এৰি থৈ পলায়ন কৰে।

জানিব পৰা মতে, শ্ৰীধৰ নামৰ ব্যক্তিজন দীৰ্ঘদিন ধৰি বৃক্কৰ গুৰুতৰ ৰোগত আক্ৰান্ত হৈ আছিল। তেওঁৰ দুয়োটা কিডনীয়েই বিকল হৈ পৰিছিল আৰু তেওঁ মৃত্যুৰ সৈতে যুঁজি আছিল। কিন্তু দুৰ্ভাগ্যজনকভাৱে, তেওঁৰ পত্নীয়ে তেওঁৰ চিকিৎসাৰ দায়িত্ব লোৱাৰ পৰিৱৰ্তে জগতীয়াল চহৰৰ এক নিৰ্জন শ্মশানত তেওঁক পেলাই থৈ যায়। মৃত্যুৰ মুখত পৰা এজন মানুহক যি ঠাইত মৃতদেহ সৎকাৰ কৰা হয়, তেনে এক স্থানত এৰি থৈ যোৱা কাৰ্যই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।

শ্মশানৰ দৰে এক নিৰ্জন ঠাইত এজন ব্যক্তি অসহায়ভাৱে আৰু গুৰুতৰ অসুস্থ অৱস্থাত পৰি থকা দেখি একাংশ সচেতন স্থানীয় লোক আগবাঢ়ি আহে। তেওঁলোকে পলম নকৰি মানৱতাৰ খাতিৰত শ্ৰীধৰক উদ্ধাৰ কৰে আৰু ততাতৈয়াকৈ জিলা হাস্পতাললৈ প্ৰেৰণ কৰে। অচিনাকি লোকৰ এই ক্ষিপ্ৰ পদক্ষেপৰ বাবেই শ্ৰীধৰৰ প্ৰাণ ৰক্ষা পৰে।

এজন স্থানীয় প্রত্যক্ষদৰ্শীয়ে কয় যে,"যি কাম নিজৰ মানুহে কৰিব লাগিছিল, সেই কাম অচিনাকি মানুহে কৰি দেখুৱালে। পত্নীৰ এনে নিৰ্দয় কাণ্ডই সমাজৰ বাবে এক লজ্জাজনক অধ্যায়ৰ সূচনা কৰিছে।"

বৰ্তমান শ্ৰীধৰে হাস্পতালত চিকিৎসাধীন হৈ আছে যদিও তেওঁৰ অৱস্থা এতিয়াও সংকটজনক। শাৰীৰিক যন্ত্ৰণাৰ লগতে আপোনজনৰ পৰা পোৱা এই চৰম বিশ্বাসঘাতকতাই তেওঁক মানসিকভাৱেও ভাঙি পেলাইছে। ইফালে, আৰক্ষীয়ে সমগ্ৰ ঘটনাটোৰ তদন্ত আৰম্ভ কৰিছে আৰু পত্নীৰ এনে অমানৱীয় কাৰ্যৰ বিৰুদ্ধে আইনী ব্যৱস্থা গ্ৰহণৰ সম্ভাৱনা আছে।

এই ঘটনাই প্ৰমাণ কৰিছে যে কেতিয়াবা তেজৰ সম্পৰ্কতকৈও মানৱীয়তাৰ সম্পৰ্ক বহুত ডাঙৰ হৈ পৰে। এতিয়া প্ৰশ্ন হয়, এজন অসুস্থ স্বামীক এনেদৰে মৃত্যুৰ মুখলৈ ঠেলি দিয়া পত্নীৰ বিৰুদ্ধে সমাজে কেনে ধৰণৰ প্ৰতিক্ৰিয়া প্ৰকাশ কৰিব?