মৰিগাঁও অতিৰিক্ত আৰক্ষী অধীক্ষক সমীৰণ বৈশ্যৰ পত্নীৰ শোকাবহ মৃত্যু

ডিজিটেল ডেস্কঃ দিন ৰাতি একাকাৰ কৰি অপৰাধীৰ পিছত দৌৰা মৰিগাঁৱৰ এজন আৰক্ষী বিষয়া যেন আজি মৌন, বাকৰুদ্ধ। মৰিগাঁও জিলাৰ অপৰাধীৰ বাবে আতংকৰ অন্য নাম যেন সমীৰণ বৈশ্য।

দুৰন্ত মানুহজন যেন আজি ক্লান্ত, ভাগৰুৱা, শোকস্তব্ধ । সমীৰণ বৈশ্যৰ পত্নী ভাস্বতী হাজৰিকা। এটি প্ৰায় তিনি বছৰীয়া সন্তানৰ মাতৃ ভাস্বতী। হয়তো সমীৰণ বৈশ্যৰ জীৱনৰ অনন্য প্ৰেৰণা আছিল ভাস্বতী হাজৰিকা। কণমানি সন্তান আৰু পত্নী ভাস্বতীৰ সৈতে সমীৰণ বৈশ্যৰ সুখৰ সংসাৰত দুখৰ অশ্ৰু নাছিল। 

কিন্তু হঠাৎ যেন ধুমুহাই ডেউকা ভাঙিলে মানুহ জনৰ। বুধবাৰে পুৱতি নিশা হৃদ ৰোগত আক্ৰান্ত হৈ হঠাৎ অসুষ্ঠ হৈ পৰে ভাস্বতী হাজৰিকা। চিকিৎসালয়ত ভৰ্তি কৰা হয় যদিও স্বামী আৰু কণমানী সন্তানটিক অকলসৰীয়া কৰি কাকো নোকোৱাকৈ অজান দেশলৈ গুছি গ'ল ভাস্বতী হাজৰিকা। 

গুৱাহাটী নৱগ্ৰহ শ্মশানত আজি শেষকৃত্য সম্পন্ন কৰা হয় ভাস্বতীৰ। কণমানি সন্তানক বুকুত সাৱতি চকুলো ঢাকি সমীৰণে বিদায় দিলে ভাস্বতীক।

দক্ষ আৰক্ষী বিষয়া সমীৰণ বৈশ্যৰ দুখৰ সমভাগী হৈ বিভিন্ন গুনমুগ্ধৰ সমবেদনা। ভাস্বতী যতেই আছে সুখত থাকক। সংকট কাল অতিক্ৰম কৰিবলৈ নেদেখা জনে শক্তি দিয়ক সমীৰণ বৈশ্যক। ভাবিবলৈ সাহস দিয়ক, জীৱন এনেকুৱাই।

এই কঠিন ক্ষণত সহকৰ্মীক সাহস দিবলৈ উপস্থিত অসম আৰক্ষীৰ সঞ্চালক প্ৰধান । মৰিগাঁও জিলাৰ অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্যৰ পত্নীৰ আকস্মিক বিয়োগৰ খবৰ লাভ কৰা লগে লগে বিষয়া গৰাকীৰ গৃহত উপস্থিত ডিজিপি হৰ্মিত সিং ।