অবৈধ মদৰ ঘাটি উচ্ছেদৰ দাবীত এইবাৰ ৰাজপথত নামিল এদল মহিলা

ডিজিটেল ডেস্কঃ  অবৈধ মদৰ ঘাটি উচ্ছেদ কৰিবলৈ দাবী জনাই নৱ গঠিত মৰিয়নী সমষ্টিৰ বনাই বাৰেঘৰৰ এদল সচেতন মহিলাই সমদল কৰি প্ৰতিবাদ সাব্যস্ত কৰে।এই সমদলৰ যোগেদি মহিলাসকলে মদৰ পৰা সৃষ্টি হোৱা বিভিন্ন অপ্ৰীতিকৰ পৰিস্থিতিৰ কথা শ্লোগানেৰে ৰাইজক অৱগত কৰিবলৈ চেষ্টা কৰে।

উল্লেখযোগ্য যে বিগত সময়চোৱাত মদৰ ঘাটি উচ্ছেদৰ সন্দৰ্ভত আবকাৰী বিভাগক অভিযোগ দিছিল যদিও আবকাৰী বিভাগে কেৱল কতব্যৰ খাটিৰত আহি অঞ্চলটি পৰিদৰ্শন কৰে আৰু মদৰ দোকানীৰ সৈতে মিতিৰালি কৰি দেখিও নেদেখাৰ ভাও ধৰে বুলি অভিযোগ তুলিছে মহিলাসকলে।

ইপিনে বহুবাৰ আবকাৰী বিভাগে কোনে তেওঁলোকক খৰব দিওতাৰ পৰিচয় গোপনে ৰখাৰ পৰিৱৰ্তে সেই কথাও মদৰ দোকানীক জনাই পৰিবেশ বিনষ্ট কৰিছে আৰু গাৱঁৰ মাজতে শত্ৰুতা কৰাৰ পৰিবেশ সৃষ্টি কৰিছে বুলিও মন্তব্য কৰিছে।সেয়ে এইবাৰ কোনো বিভাগ তথা আৰক্ষী প্ৰশাসনলৈ বাট নাচাই অঞ্চলৰ পৰিবেশ বিনষ্ট কৰিবলৈ চেষ্টা কৰা সকলৰ বিৰুদ্ধে মহিলাসকলে নিজে পদক্ষেপ গ্ৰহণ কৰাৰ সিদ্ধান্ত গ্ৰহণ কৰিছে।