বঢ়মপুৰৰ ধনতোলাত মাটিৰ অবৈধ খনন, বন বিভাগৰ নিৰ্দেশ অমান্য কৰাৰ অভিযোগ

ডিজিটেল ডেস্ক : নগাঁও জিলাৰ কঠিয়াতলী আঞ্চলিক বন বিষয়াৰ কার্যালয় আৰু নগাঁও সদৰ আঞ্চলিক বন বিষয়াৰ কাৰ্যালয়ৰ অন্তৰ্গত বঢ়মপুৰৰ ধনতোলাত ভূ-মাফিয়াৰ দপদপনি চলা দেখিবলৈ পোৱা গৈছে। ভূ-মাফিয়া জনৈক পাটৰৰ নেতৃত্বত ননৈ নৈৰ পাৰৰ বিঘাই বিঘাই মাটি চক্রটোৱে খান্দিছে। 

বন বিভাগৰ নিয়ম অনুসৰি মাটি তিনি ফুটতকৈ অধিক দকৈ খান্দিব নোৱাৰে। কিন্তু বন বিভাগৰ সেই নির্দেশনাক জলাঞ্জলি দি ভু-মাফিয়া পাটৰৰ নেতৃত্বত অবাধ হাৰত চলিছে মাটি খনন কার্য। আনহাতে, মাটি কঢ়িওরা ডাম্পাৰসমূহৰ প্রত্যেকখনৰে থাকিব লাগে বন বিভাগৰ চালান, কিন্তু চালান বিহীনভাৱে চলিছে ডাম্পাৰসমূহ। ভূ মাফিয়াজনৰ নেতৃত্বত বন বিভাগৰ সকলো আইন অমান্য কৰি চলিছে মাটিৰ ব্যবসায়। কিন্তু ইয়াৰ পাছতো কঠীয়াতলী আঞ্চলিক বন বিষয়া কার্যালয় আৰু নগাঁও সদৰ আঞ্চলিক বন বিষয়াৰ কার্যালয়ে কোনো ব্যবস্থা নোলোৱাৰ অভিযোগ উঠিছে। 

আনহাতে, তীব্রবেগী মাটি কঢ়িওৱা ডাম্পাৰৰ দৌৰাত্ম্যত স্থানীয় ৰাইজ অতিষ্ঠ হৈ পৰিছে যদিও আজিকোপতি পুৰণিগুদাম আৰক্ষীয়েও তীব্রবেগী ডাম্পাৰৰ ক্ষেত্রত কোনো বিশেষ ব্যবস্থা গ্রহণ কৰা নাই। ৰাজনৈতিক আশীর্বাদপুষ্ট ভূ-মাফিয়া চক্রটোৱে ননৈ নৈৰ কাষতে মাটি খান্দি নৈখনলৈও আনিছে বিপদৰ শংকা। যাৰ বাবে এতিয়া স্থানীয় ৰাইজ ক্ষুব্ধ হৈ পৰিছে।

উৎসঃ দৈনিক জনমভূমি