ডিজিটেল ডেস্কঃ কৰ্ণাটকৰ বিজয়পুৰ জিলাত দেওবাৰে বিয়লি এক ভয়ংকৰ বিমান দুৰ্ঘটনা সংঘটিত হয়। উৰণৰ মাজভাগতে কাৰিকৰী বিজুতিৰ সন্মুখীন হোৱা এখন ব্যক্তিগত প্ৰশিক্ষণ বিমান জিলাখনৰ বাবলেশ্বৰ তালুকৰ মংগলুৰু গাঁৱৰ এখন কৃষিভূমিৰ মাজত দুৰ্ঘটনাগ্ৰস্ত হয়।
এই ঘটনাত বিমানখনৰ দুই পাইলট আহত হৈছে যদিও বৰ্তমান তেওঁলোকৰ অৱস্থা স্থিৰ বুলি জানিব পৰা গৈছে।
আৰক্ষীৰ সূত্ৰই জনোৱা মতে, 'ৰেড বাৰ্ড এভিয়েচন' (Red Bird Aviation) নামৰ ব্যক্তিগত প্ৰতিষ্ঠানটোৰ এই দুই আসনযুক্ত লঘু বিমানখন কালবুৰ্গীৰ পৰা বেলাগাভিলৈ উৰা মাৰিছিল। যাত্ৰাপথত বিমানখনৰ ইঞ্জিনত হঠাত্ যান্ত্ৰিক বিজুতিয়ে দেখা দিয়ে। ফলস্বৰূপে, পাইলটে নিয়ন্ত্ৰণ হেৰুৱাই পেলায় আৰু বিমানখন এখন মুকলি পথাৰত আছাৰ খাই পৰে। দুৰ্ঘটনাটো ইমানেই প্ৰবল আছিল যে বিমানখনৰ কেইবাটাও অংশ ভাঙি টুকুৰা-টুকুৰ হৈ পৰে।
বিমানখনত এজন প্ৰশিক্ষক কেপ্টেইন আৰু এজন প্ৰশিক্ষাৰ্থী পাইলট আছিল। স্থানীয় লোকে লগে লগে উদ্ধাৰ অভিযান চলাই দুয়োকে বিমানখনৰ ধ্বংসাৱশেষৰ মাজৰ পৰা উলিয়াই আনে। পৰৱৰ্তী সময়ত বাবলেশ্বৰ আৰক্ষী ঘটনাস্থলীত উপস্থিত হৈ তেওঁলোকক স্থানীয় চিকিৎসালয়ত ভৰ্তি কৰায়। চিকিৎসকৰ মতে, দুয়োৰে শৰীৰত আঘাত লাগিছে যদিও তেওঁলোক সংকটমুক্ত।
ঘটনাৰ খবৰ পোৱাৰ পিছতেই অসামৰিক বিমান পৰিবহন সঞ্চালকালয়ে (DGCA) বিষয়টোৰ ওপৰত দৃষ্টি ৰাখিছে। কি পৰিস্থিতিত এই দুৰ্ঘটনা সংঘটিত হ’ল আৰু বিমানখনৰ ৰক্ষণাবেক্ষণত কোনো ত্ৰুটি আছিল নেকি, সেই সন্দৰ্ভত এক উচ্চস্তৰীয় তদন্ত আৰম্ভ কৰা হৈছে।
Continue Reading
