নাছাৰ দুই সহস্রাধিক কৰ্মচাৰীক চাটাই কৰিব ট্রাম্পে

ডিজিটেল ডেস্কঃ মার্কিন ৰাষ্ট্ৰপতি ড'নাল্ড ট্রাম্পৰ প্রশাসনে নেশ্যনেল এৰ'নটিকছ এণ্ড স্পেচ এডমিনিষ্টেশ্যনৰ (নাছা) দুই সহস্রাধিক কৰ্মচাৰীক চাকৰিৰ পৰা চাটাই কৰাৰ পৰিকল্পনা কৰিছে।

আমেৰিকাত ৰাজনীতি বিষয়ৰ লগত জড়িত সংবাদ মাধ্যম 'পলিটিক' 'ই প্রকাশ কৰা অনুসৰি, ট্রাম্প প্রশাসনে নাছাৰ ২১৪৫জন জ্যেষ্ঠ পৰ্যায়ৰ কৰ্মচাৰীৰ চাকৰি কৰ্তন কৰিবলৈ পৰিকল্পনা কৰিছে।

নাছাৰ এই কৰ্মচাৰীসকল বিশেষভাৱে দক্ষ আৰু পৰিচালনাৰ ক্ষেত্ৰত পাৰদৰ্শিতা থকা কৰ্মচাৰী বুলি পলিটিক'ই প্রকাশ কৰা তথ্যত কোৱা হৈছে। হোৱাইট হাউছৰ মহাকাশ নীতিক একাষৰীয়া কৰি আৰু নাছাই দশক দশক ধৰি আমেৰিকাক আগবঢ়াই অহা সেৱাক বঞ্চিত কৰি ট্রাম্প প্রশাসনে মহাকাশ সংস্থাটোৰ জ্যেষ্ঠ পৰ্যায়ৰ চৰকাৰী স্তৰৰ জি এছ-১৩ৰ পৰা জি এছ-১৫ পদত থকা কৰ্মচাৰীসকলক চাকৰিৰ পৰা চাটাই কৰাৰ প্ৰক্ৰিয়া আৰম্ভ কৰিছে।

পলিটিক'ই প্ৰকাশ কৰা প্রতিবেদনখনৰ মতে, মার্কিন প্রশাসনে এই ভুক্তভোগী দক্ষ কৰ্মচাৰীসকলক আগতীয়াকৈ অৱসৰ অথবা বাধ্যতামূলক অৱসৰ ল'বলৈ নিৰ্দেশ দিছে। লক্ষণীয় বিষয়টো হ'ল এয়ে যে চাটাই কৰিবলগা এই দক্ষ কৰ্মচাৰীসকল মহাকাশ সংস্থাটোৰ কেইবাটাও গুৰুত্বপূৰ্ণ অভিযানত বৰ্তমানে কৰ্মৰত হৈ আছে। নাছাৰ বিজ্ঞান-ভিত্তিক অথবা মানৱমুক্ত মহাকাশ যানৰ অভিযানত বর্তমানে এনেধৰণৰ ১৮১৮জন কৰ্মচাৰী জড়িত হৈ আছে আৰু আনকেইজন কৰ্মচাৰী নাছাৰ তথ্য-প্ৰযুক্তিৰ ক্ষেত্ৰত অভিযানসমূহত কৰ্মৰত হৈ আছে।

তদুপৰি, মহাকাশ প্রতিষ্ঠানটোৰ ব্যৱস্থাপনা আৰু বিত্তীয় দিশতো এইসকল চাটাই কৰিবলগা কৰ্মচাৰীয়ে কাম কৰি আছে। এই প্রস্তাবিত চাকৰিৰ কৰ্তন বিষয়ত প্রশ্ন কৰাত, নাছাৰ মুখপাত্র বেথানী স্টিভেনে কয় যে নাছা ইয়াৰ অভিযানসমূহ সম্পূর্ণ কৰাত প্রতিশ্রুতিবদ্ধ আৰু সীমিত সংখ্যক তথা অগ্রাধিকাৰমূলক বাজেটেৰে নাছাই কাম কৰি যোৱাৰ পৰিকল্পনা কৰিছে।

উল্লেখযোগ্য যে ২০২৬ চনৰ বাজেটত হোৱাইট হাউছে নাছালৈ আবণ্টিত ধনৰ ২৫ শতাংশ কৰ্তন কৰাৰ ফলতেই এই দুই সহস্রাধিক কৰ্মচাৰীয়ে চাকৰি হেৰুৱাব আৰু ইয়াৰ ফলত নাছাৰ কৰ্মশক্তি ৫০০০লৈ হ্রাস পাব। যদি ট্রাম্প প্রশাসনৰ এই প্রস্তাৱক আমেৰিকাৰ সংসদে অনুমোদন জনাই তেনেহ'লে ১৯৬০ চনৰ পাছত নাছালৈ মার্কিন প্রশাসনে প্রদান কৰা এইখন নিম্নতম বাজেট হ'ব। ৰাষ্ট্ৰপতি ট্রাম্পে হোৱাইট হাউছলৈ দ্বিতীয়বাৰ অহাৰ পাছত নাছাৰ কৰ্মশক্তি ১৮০০০-ৰ পৰা ৫০০০ হোৱাৰ উপক্ৰম হৈছে। ইয়াৰ মাজতে ৰাষ্ট্ৰপতি ট্রাম্পে তেওঁৰ চৰকাৰৰ পৰিবহণ সচিব ছীন ডাফীক অস্থায়ীভাবে নাছাৰ প্ৰশাসক হিচাপে নিযুক্তি দিয়ে।

উৎসঃ দৈনিক জনমভূমি