মুক্তিৰ পথত এখন নতুন অসমীয়া চলচ্চিত্র ;২২ আগষ্টত ৰাজ্যত মুক্তি লাভ কৰিব 'যোদ্ধা'

ডিজিটেল ডেস্ক : অহা ২২ আগষ্টত ৰাজ্যত মুক্তি লাভ কৰিবলগীয়া অসমীয়া চলচ্ছিত্র 'যোদ্ধা'ৰ ট্ৰেইলাৰটো অলপতে মহানগৰীৰ হোটেল সুনীল গ্রেণ্ডত মুকলি কৰা হয়।

অসমৰ বহুকেইগৰাকী প্রতিষ্ঠিত শিল্পীৰ উপস্থিতিত ট্ৰেইলাৰটো মুকলি কৰে জনপ্রিয় শিল্পী জুবিন গার্গে। ট্ৰেইলাৰ মুকলি অনুষ্ঠানত ছবিখনৰ বিষয়বস্তু সন্দর্ভত সাংবাদিকে সোধা প্রশ্নৰ উত্তৰত পৰিচালক তথা ছবিখনৰ চিত্রনাট্যকাৰ ভাস্কৰ জে গোস্বামীয়ে কয়-'আমি প্রত্যেকেই নিজৰ নিজৰ কৰ্মক্ষেত্ৰ, সংসাৰৰূপী কুৰুক্ষেত্ৰত একো-একোজন যোদ্ধা। জয়-পৰাজয় বুকুত সামৰি আমি আগবাঢ়ি যাওঁ আৰু আগবাঢ়ি গৈ থাকিব লাগিব। কাৰণ, ৰৈ গ'লে সময়ে ক্ষমা নকৰিব নিশ্চয়। সময় গতিশীল। এয়াই যোদ্ধাৰ মনৰ দৃঢ়তা। এই পটভূমিত ৰচনা কৰা হৈছে প্রেম, বিষাদ আৰু একচনধর্মী ছবিখনৰ কাহিনীভাগ।'

আনহাতে, পৰিমল এণ্টাৰপ্ৰাইজৰ বেনাৰত পৰিমল বিশ্বাস আৰু ৰিমা বিশ্বাসে প্রযোজনা কৰা 'যোদ্ধা'ৰ কাহিনী-চিত্রনাট্য-সংলাপ তথা পৰিচালনা ভাস্কৰ জে গোস্বামীৰ। সংগীত পৰিচালনা কৰিছে জুবিন গার্গে। ছবিখনত সন্নিৱিষ্ট পাঁচটা গীত ৰচনা কৰিছে ক্রমে- জুবিন গাৰ্গ, শশাংক সমীৰ, ৰাহুল গৌতম শর্মা, পুনম নাথ আৰু ভাস্কৰ গোস্বামীয়ে। কণ্ঠদান কৰিছে জুবিন গাৰ্গ, চায়নিকা ভূঞা, সংগীতা হাজৰিকা আৰু ৰাহুল গৌতম শৰ্মাই।

ৰাজস্থান আৰু গোৱাৰ লগতে অসমৰ বিভিন্ন মনোমোহা লোকেচনত ছবিখনৰ দৃশ্যগ্ৰহণ কৰিছে অভিজিৎ গগৈয়ে। সম্পাদনা কৰিছে প্রতীম খাউণ্ডে। আৱহ সংগীত মুম্বাইত প্রতিষ্ঠিত অসম সন্তান তপন দত্তৰ। শব্দ সংযোজনা আন্তঃৰাষ্ট্ৰীয় খ্যাতিসম্পন্ন দেৱজিৎ চাংমাই আৰু অমৃত প্রীতমৰ।

উৎসঃ দৈনিক জনমভূমি