গোৱালপাৰাত ভয়ংকৰ ডকাইতি কাণ্ড! দম্পতীক গুৰুতৰভাৱে আহত কৰি লুটি নিলে লাখ টকা নগদ ধনসহ সোণৰ অলংকাৰ

ডিজিটেল ডেস্কঃ গোৱালপাৰা জিলাৰ টিপলাইৰ বনগাঁও কলিতাপাৰাত সংঘটিত হয় লোমহৰ্ষক ডকাইতি কাণ্ড৷ নিশা সুশীল কলিতাৰ ঘৰত লুটপাত চলায় পাঁচজনীয়া অস্ত্ৰধাৰী ডকাইত দলে৷ নিশা ২.২০ ৰ পৰা ২.৩০ বজাৰ ভিতৰত ঘৰৰ দুৱাৰ ভাঙি প্ৰবেশ কৰে ডকাইতৰ দলটোৱে ৷

ঘৰৰ ভিতৰত প্ৰবেশ কৰিয়ে পত্নী নমিতা কলিতাক হাতুৰীৰে মূৰত মাৰি আহত কৰি বান্ধি থয় ৷ তাৰ পিছতে সুশীল কলিতাক মাৰধৰ কৰি বান্ধি থয় আৰু দুটাকৈ পিষ্টল আৰু দুখন চোকা অস্ত্ৰৰে হত্যাৰ ভাবুকি দিয়ে সুশীল কলিতাক।

সুশীল কলিতাৰ লগত থকা প্ৰায় ১৬ হাজাৰ টকা আৰু পত্নীৰ সাঁচতীয়া প্ৰায় ডেৰ লাখ টকা লুট কৰে ডকাইতৰ দলটোৱে ৷ তদুপৰি কলিতা দম্পতিৰ দুজনী ছোৱালীৰ বিয়াৰ বাবে যোগাৰ কৰি থোৱা প্ৰায় ১৬ তোলা সোণৰ অলংকাৰ লুটি লৈ যায় ডকাইতৰ দলে ৷ 

ঘটনাৰ খবৰ পোৱাৰ পিছতে ধূপধৰা আৰক্ষী আৰু দুধনৈ সম জিলা আৰক্ষী অধীক্ষক কলিতাৰ ঘৰত উপস্থিত হৈ তদন্ত আৰম্ভ কৰে ৷ ঘটনা সংক্ৰান্তত সোধ-পোচ কৰাৰ বাবে ধূপধৰা আৰক্ষীয়ে কেইবাজনো ব্যক্তিক আটক কৰা বুলি জানিব পৰা গৈছে ৷

 উল্লেখযোগ্য যে সুশীল কলিতা ৰংজুলি ৰাজহ চক্ৰ বিষয়াৰ কাৰ্যালয়ৰ কৰ্মচাৰী ৷ তেওঁ ৰংজুলি ৰাজহ চক্ৰৰ লাট মণ্ডল হিচাপে কৰ্মৰত হৈ আছে ৷ 

আজি সুশীল কলিতা আৰু নমিতা কলিতাক চিকিৎসাৰ বাবে গুৱাহাটীলৈ লৈ যোৱা হৈছে ৷