জন্মদিনৰ পাৰ্টিৰ পৰা উভতি আহোতে ভয়ংকৰ দুৰ্ঘটনা! একে পৰিয়ালৰ ৫জনৰ থিতাতে মৃত্যু

ডিজিটেল ডেস্কঃ নিমিষতে শেষ হৈ গ'ল এটা সুখী পৰিয়াল। এটা পৰিয়ালৰ ৫ জন সদস্যই পথ দুৰ্ঘটনাত সাবটিলে কৰুণ মৃত্যুক। এটা জন্মদিনৰ পাৰ্টিৰ পৰা উভতি অহাৰ সময়তে দুৰ্ঘটনাত পতিত হয় পৰিয়ালটোৰ বাহনখন।

নিয়ন্ত্ৰণহীন গাড়ীখনে ডিভাইডাৰ পাৰ হৈ সিপাৰৰ এখন ট্ৰাকত খুন্দা মাৰে। তাৰপাছত চূৰমাৰ হোৱা গাড়ীখনৰ পৰা ভাঁহি আহে মৃত্যুৰ চিঞৰ। একেটা পৰিয়ালৰ পাঁচজনৰ মৃত্যুয়ে কঁপাই গ’ল সকলোৰে হৃদয়।

উত্তৰ প্ৰদেশৰ মইনপুৰীত সংঘটিত হৈছে এই ভয়ংকৰ পথ দুৰ্ঘটনা। এই বৃহৎ পথ দুৰ্ঘটনাই এটি সুখী পৰিয়াললৈ নমাই আনিলে কাল অমানিশা।

জানিব পৰা মতে, পৰিয়ালটো আগ্ৰাৰ পৰা উভতি আহিছিল চুইফট গাড়ীৰে। তাৰ পাছত বৰষুণত নিয়ন্ত্ৰণহীন হৈ ডিভাইডাৰ পাৰ হৈ সিপাৰৰ এখন তীব্ৰবেগী ট্ৰাকত খুন্দা মাৰে। দুৰ্ঘটনাটোত ২ গৰাকী মহিলা,

২ টি শিশু আৰু এজন পুৰুষৰ থিতাতে মৃত্যু হয়। আহত হৈছে এগৰাকী কিশোৰী।

দিল্লী-কানপুৰ ৰাষ্ট্ৰীয় ঘাইপথ (জিটি ৰোড)ত সংঘটিত হয় এই মৰ্মান্তিক দুৰ্ঘটনা। তথ্য অনুসৰি পৰিয়ালৰ সদস্যসকলে এটা জন্মদিনৰ পাৰ্টিত অংশগ্ৰহণ কৰি আগ্ৰাৰ পৰা উভতি আহিছিল।

প্ৰাৰম্ভিক তদন্তত প্ৰৱল বৰষুণ এই দুৰ্ঘটনাৰ কাৰণ বুলি জানিব পৰা হৈছে। গাড়ীখনৰ বিধ্বস্ত ৰূপ দেখিয়েই এই দুৰ্ঘটনাৰ ভয়াৱহতা বুজিব পাৰি । ঘটনাস্থলীত উপস্থিত হৈ আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।