৮ জন পুৰুষক বিয়া কৰাই লাখ লাখ টকা প্ৰতাৰণা! ৯ নম্বৰ দৰাৰ সন্ধানত থাকোতেই গ্ৰেপ্তাৰ প্ৰবঞ্চক কইনা

ডিজিটেল ডেস্কঃ এগৰাকী প্ৰবঞ্চক কইনা। কইনাগৰাকীয়ে এজন বা দুজন নহয় আঠজন পুৰুষক বিয়া কৰাই লাখ লাখ টকাৰ প্ৰতাৰণা কৰাৰ অভিযোগ উত্থাপন হৈছে। মহাৰাষ্ট্ৰৰ নাগপুৰৰ পৰা পোহৰলৈ আহিছে এই চাঞ্চল্যকৰ ঘটনা। আৰক্ষীয়ে এতিয়া গ্ৰেপ্তাৰ কৰিছে এইগৰাকী ‘লুটেৰী দুলহন’ক। অভিযুক্ত মহিলাগৰাকীৰ নাম ছামিৰা ফাতিমা। ৯ নম্বৰৰ দৰাৰ সন্ধানত থাকোতেই আৰক্ষীয়ে গ্ৰেপ্তাৰ কৰে ফাতিমাক।

আৰক্ষীৰ তদন্তত প্ৰকাশ পাইছে যে ছামিৰা ফাতিমাই মেট্ৰিমনিয়েল ৱেবছাইট আৰু ফেচবুকৰ দৰে ছ’চিয়েল মিডিয়া প্লেটফৰ্ম ব্যৱহাৰ কৰি ধনী আৰু বিবাহিত মুছলমান পুৰুষক লক্ষ্য কৰি লৈছিল। তেওঁ নিজকে বিবাহ বিচ্ছেদ হোৱা আৰু সন্তানৰ মাতৃ বুলি আৱেগিক কাহিনী কৈছিল, সেই দুখভৰা কাহিনী শুনি তেওঁক বিয়া কৰাবলৈ সন্মত হৈছিল এজনৰ পাছত এজনকৈ ৮জন পুৰুষ।

চাঞ্চল্যকৰ কথাটো হ’ল ছামিৰা ফাতিমা এগৰাকী শিক্ষয়িত্ৰী আৰু এগৰাকী শিক্ষিত মহিলা। যোৱা ১৫ বছৰ ধৰি তেওঁ এই প্ৰৱঞ্চনা চলাই আহিছিল বুলি আৰক্ষীয়ে সন্দেহ প্ৰকাশ কৰিছে। তেওঁ অকলে এই কাম কৰা নাছিল, বৰঞ্চ সংগঠিত গেঙৰ সৈতে এই ষড়যন্ত্ৰ ৰচনা কৰিছিল।

মহিলাগৰাকীয়ে প্ৰথমে নাগপুৰ চহৰৰ বিভিন্ন অঞ্চলত বাস কৰা পুৰুষক প্ৰেমত আৱদ্ধ কৰি বিয়া কৰাইছিল আৰু এমাহৰ পাছত তেওঁলোকৰ সৈতে কাজিয়া কৰি তেওঁলোকৰ পৰা ধন আদায় কৰিছিল। আৰক্ষীৰ তথ্য অনুসৰি বিগত ডেৰ বছৰ ধৰি পলাতক অৱস্থাত আছিল ফাতিমা।

আৰক্ষীয়ে পোৱা প্ৰাৰম্ভিক প্ৰমাণ অনুসৰি ফাতিমাই এজন ভুক্তভোগীক ৫০ লাখ টকা আৰু আন এজনক ১৫ লাখ টকাৰ প্ৰতাৰণা কৰিছে। নগদ ধন আৰু বেংক ট্ৰেন্সফাৰৰ জৰিয়তে তেওঁ এই ধন আদায় কৰিছিল। একে সময়তে এজন স্বামীয়ে দাবী কৰিছে যে ভাৰতীয় ৰিজাৰ্ভ বেংকৰ উচ্চপদস্থ বিষয়াসকলকো তেওঁৰ ফান্দত আবদ্ধ কৰি ৰাখিছিল।

বিয়াৰ পিছত বিভিন্ন অজুহাতত স্বামীক ব্লেকমেইল কৰি ধন আদায় কৰিছিল ফাতিমাই। যেতিয়াই আৰক্ষীয়ে গ্ৰেপ্তাৰ কৰিবলৈ আহিছিল, তেতিয়াই তেওঁ ভুৱা গৰ্ভধাৰণৰ দাবী কৰি পলায়ন কৰিছিল। অৱশ্যে এইবাৰ আৰক্ষীয়ে সম্পূৰ্ণ প্ৰস্তুতিৰে ২৯ জুলাইত নাগপুৰৰ এখন চাহৰ দোকানৰ পৰা গ্ৰেপ্তাৰ কৰে ফাতিমাক।

বৰ্তমান নাগপুৰ আৰক্ষীয়ে ছামিৰা ফাতিমাৰ বিৰুদ্ধে গোচৰ ৰুজু কৰি সমগ্ৰ নেটৱৰ্কৰ তদন্ত আৰম্ভ কৰিছে। আৰক্ষীৰ মতে এই গোচৰত আৰু বহু ভুক্তভোগী আগবাঢ়ি আহিব পাৰে আৰু গেংটোৰ সৈতে জড়িত আন লোকক অতি সোনকালে গ্ৰেপ্তাৰ কৰা হ’ব পাৰে।