ডিজিটেল ডেস্কঃ হিমাচল প্ৰদেশৰ মাণ্ডীৰ সাংসদ কংগনা ৰানাৱটে লোকসভাৰ বিৰোধী দলপতি ৰাহুল গান্ধীৰ বিৰুদ্ধে এক অদ্ভুত অভিযোগ উত্থাপন কৰিছে। তেওঁ কয় যে, মই ভাবো ৰাহুল গান্ধীয়ে ড্ৰাগছ সেৱন কৰে, তেওঁৰ পৰীক্ষা কৰা উচিত। সংসদত ৰাহুল গান্ধীয়ে দিয়া এক বক্তব্যক লৈ কংগনাই এই প্ৰতিক্ৰিয়া প্ৰকাশ কৰে।
কংগনাই কয়, দেশত গণতন্ত্ৰ আছে। ইয়াত প্ৰধানমন্ত্ৰীক গণতান্ত্ৰিকভাৱে নিৰ্বাচিত কৰা হয়। তেওঁ প্ৰশ্ন কৰে, লিংগ, বয়স, জাতি আৰু শ্ৰেণীৰ প্ৰতি লক্ষ্য ৰাখি প্ৰধানমন্ত্ৰী নিৰ্বাচন কৰা হয় নেকি? কংগনাই কয়, ৰাহুলে এনেদৰে কথা পাতি প্ৰতিদিনে সংবিধানক আঘাত কৰে।
বিজেপিৰ সাংসদ কংগনাই ৰাহুল গান্ধীয়ে গণতন্ত্ৰক অপমান কৰাৰ অভিযোগ উত্থাপন কৰে। তেওঁ কয়, বয়স আৰু লিংগৰ ভিত্তিত এতিয়া প্ৰধানমন্ত্ৰী বাছনি কৰা হ’বনে? কাইলৈ তেওঁ ক’ব যে ছালৰ ৰঙৰ ভিত্তিত প্ৰধানমন্ত্ৰী নিৰ্বাচন কৰা হ’ব। তেওঁলোকে গণতন্ত্ৰক সন্মান কৰেনে?
ৰাহুল গান্ধীক লক্ষ্য কৰি কংগনাই কয়, কালি সংসদত এটা কমেডী শ্ব’ও কৰা হৈছিল, তেওঁৰ কোনো মৰ্যাদা নাই। কালি তেওঁ চক্ৰব্যুহক লৈ কথা কৈছিল। মই ভাবো তেওঁ ড্ৰাগছ সেৱন কৰে নেকি পৰীক্ষা কৰি চাব লাগে।
কংগনাই ক’লে, সংসদত উপস্থিত হোৱাৰ পিছত তেওঁলোকে যি অৱস্থাত অভদ্ৰভাৱে কথা পাতে, সেই অৱস্থা দেখি মই আচৰিত হ’লোঁ৷ মই ভাবো তেওঁৰ পৰীক্ষা কৰা উচিত, হয় তেওঁ মদ্যপান কৰিছিল নহয় ড্ৰাগছৰ প্ৰভাৱত আছিল।
কি কৈছিল ৰাহুল গান্ধীয়ে?
আচলতে সংসদত বাজেটৰ আলোচনাৰ সময়ত ৰাহুল গান্ধীয়ে মহাভাৰতৰ কথা উল্লেখ কৰিছিল। ৰাহুল গান্ধীয়ে কৈছিল, হাজাৰ হাজাৰ বছৰৰ আগতে চক্ৰব্যুহত আবদ্ধ হৈ অভিমন্যুক হত্যা কৰা হৈছিল। একেধৰণৰ চক্ৰব্যুহ এতিয়া প্ৰস্তুত কৰা হৈছে। ইয়াৰ লগত কৃষক আৰু যুৱক-যুৱতীক জড়িত কৰা হৈছে।
Continue Reading
