‘সন্ত্ৰাসবাদ আৰু মেচ কেনেকৈ একেলগে চলিব পাৰে’, ভাৰত-পাকিস্তানৰ মেচক লৈ প্ৰশ্ন উত্থাপন AIMIMৰ

ডিজিটেল ডেস্কঃ ১৪ ছেপ্টেম্বৰত ডুবাইত অনুষ্ঠিত হ’বলগীয়া ভাৰত আৰু পাকিস্তানৰ মাজত এছিয়া কাপ ২০২৫ৰ মেগা মেচৰ পূর্বে ৰাজনৈতিক পৰিৱেশ উত্তপ্ত হৈ পৰিছে৷ 

পেহেলগাম সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ খেলখনক লৈ বিৰোধীয়ে প্ৰশ্ন উত্থাপন কৰিবলৈ আৰম্ভ কৰিছে। এই সন্দৰ্ভত সৰ্বভাৰতীয় মজলিছ-ই-ইত্তেহাদুল মুছলমিনৰ নেতা ছাদাব চৌহানে প্ৰশ্ন উত্থাপন কৰিছে।

এছিয়া কাপত ভাৰত-পাকিস্তানৰ খেলখন সন্দৰ্ভত এআইএমআইএমৰ মুখপাত্ৰ ছাদাব চৌহানে কয় যে, ‘পাহলগামত পাকিস্তানী সন্ত্ৰাসবাদীয়ে আমাৰ নিৰীহ সাধাৰণ নাগৰিকক হত্যা কৰি ভাৰতত ধৰ্মীয় যুদ্ধ চলাবলৈ ষড়যন্ত্ৰ কৰিছিল, যিটো ভাৰতীয় সেনা আৰু জনসাধাৰণে সম্পূৰ্ণৰূপে বিফল কৰি পেলায়।

'সন্ত্ৰাসবাদ আৰু মেচ কেনেকৈ একেলগে চলিব পাৰে?'

এআইএমআইএমৰ নেতাগৰাকীয়ে আৰু কয়, "ভাৰত চৰকাৰ আৰু ভাৰতীয় সেনাই স্পষ্ট কৰি দিছে যে অপাৰেচন সিন্দুৰ চলি আছে। যদি অপাৰেচন সিন্দুৰ চলি আছে আৰু আমি যুদ্ধৰ অৱস্থাত আছো, তেন্তে ক্ৰিকেট মেচ কেনেকৈ হ'ব পাৰে।

তেওঁ প্ৰশ্ন উত্থাপন কৰিছে যে, "ক্ৰিকেট দেশতকৈ ডাঙৰ নেকি ? বিচিচিআই দেশতকৈ ডাঙৰ হৈছে নেকি? এইটোও ঘোষণা কৰা হৈছে যে আজি আমি কিথোৰত এখন ডাঙৰ ৰাজহুৱা সভাৰ জৰিয়তে ঘোষণা কৰিবলৈ ওলাইছো যে আমি সকলোৱে এই মেচ বৰ্জন কৰিছো।" তেওঁ আৰু কয় যে, পাকিস্তানে সন্ত্ৰাসবাদ ত্যাগ নকৰালৈকে আমি এনে মেচ চাব নোৱাৰো।