আৰিয়ানেই নহয়, বিমানবন্দৰত শ্বাহৰুখকো হাৰাশাস্তি কৰিছিল সমীৰ ৱাংখেড়েই; কি আছিল কাৰণ?

ডিজিটেল ডেস্কঃ ড্ৰাগছ সেৱন আৰু লগত ৰখাৰ অভিযোগত শ্বাহৰূখপুত্ৰ আৰিয়ান খানক নাৰ্ক'টিকছ কণ্ট্ৰ'ল ব্যুৰ'ৱে গ্ৰেপ্তাৰ কৰাৰ পাছৰেপৰা অধিক চৰ্চিত হৈছে এনচিবিৰ মুম্বাই জ'নেল ডাইৰেক্টৰ সমীৰ ৱাংখেড়ে। পোহৰলৈ আহিছে সমীৰৰ ইটোৰ পাছত সিটো পুৰণি অধ্যায়। মহাৰাষ্ট্ৰৰ মন্ত্ৰী তথা এনচিপিৰ নেতা নৱাব মালিকৰ পৃষ্ঠপোষকতাত সমীৰ ৱাংখেড়েৰ বিৰুদ্ধে উত্থাপিত হৈছে নানা অভিযোগ।

আৰিয়ান কাণ্ডই দেশযুৰি আলোচিত হৈ থকাৰ মাজতেই পৰ্দা আঁতৰিছে সমীৰ ৱাংখেড়েৰ বহু পুৰণি ঘটনাৰ। বলীউডত পত্নীৰ ব্যৰ্থতাৰ পৰা পুৰণি বিবাহৰ খোলোচালৈকে কিমান যে পৰিঘটনা! বলীউডত পত্নীৰ ব্যৰ্থতাৰ পোতক তুলিবলৈ সমীৰে আৰিয়ানক গ্ৰেপ্তাৰ কৰা বুলি গুজব ওলাইছিল। নৱাব মালিকে পূৰ্বৰ বিবাহৰ অভিযোগেও বিপদত পেলাইছে সমীৰ ৱাংখেড়েক। এইবাৰ পোহৰলৈ আহিছে শ্বাহৰূখ খানৰ সৈতে এটা দশক আগত হোৱা সমীৰ ৱাংখেড়েৰ এক ঘটনা। ২০১১ চনত বিমানবন্দৰত শ্বাহৰূখৰ বাট ভেটিছিল সমীৰ ৱাংখেড়েই। পৰিয়ালৰ সৈতে লণ্ডনত অৱসৰ বিনোদন কৰি ভাৰতলৈ উভতি অহা শ্বাহৰূখ খানত দীৰ্ঘ সময় আবদ্ধ কৰি ৰাখিছিল সমীৰ ৱাংখেড়েই। শ্বাহৰূখে লগত ২০টা বেগ লৈ অহা বাবে তেতিয়াৰ কাষ্টম বিভাগৰ ডেপুটি কালেক্টৰ সমীৰ ৱাংখেড়েৰ নেতৃত্বত এটা দলে জেৰা কৰিছিল বাদশ্বাহক। পৰিয়ালৰ অন্য লোকসকলক যাবলৈ দিয়া হয় যদিও শ্বাহৰূখ খানক বহু সময় আবদ্ধ কৰি ১.৫ লাখ টকাৰ জৰিমনা বিহে সমীৰ ৱাংখেড়েই।

আৰিয়ান খানক গ্ৰেপ্তাৰ কৰাৰ পাছতেই তদন্তকাৰী সংস্থাটোৱে শ্বাহৰূখ খানক লক্ষ্য কৰি লোৱা বুলি চৰ্চা হোৱাত সমীৰ ৱাংখেড়েই কাকো ব্যক্তিগতভাবে লক্ষ্য কৰাৰ কথা অস্বীকাৰ কৰে। ড্ৰাগছ সেৱন আৰু লগত ৰখাৰ প্ৰমাণ নোহোৱাকৈ কেইবাবছৰো পুৰণি হোৱাটছএপ চাটৰ আধাৰত আৰিয়ানক গ্ৰেপ্তাৰ কৰাৰ পাছত এতিয়া প্ৰশ্ন হৈছে এনচিবি-এ মুন্দ্ৰা বন্দৰৰ তিনি হাজাৰ কেজি হেৰ'ইন জব্দ হোৱা ঘটনাক কিমান গুৰুত্ব দিছে?