ৰাজহুৱা খণ্ডৰ প্ৰতিষ্ঠানৰ বাবে ধন নাই চৰকাৰৰ ! ভাৰালৈ বিএছএনএলৰ কাৰ্যালয়

ডিজিটেল ডেস্ক : ৰাজহুৱা খণ্ডৰ উদ্যোগ-প্ৰতিষ্ঠান ব্যক্তিগতকৰণৰ সিদ্ধান্ত কেন্দ্ৰীয় চৰকাৰৰ কোনো নতুন কথা নহয়৷ দেশৰ প্ৰায়বোৰ ৰাজহুৱা খণ্ডৰ উদ্যোগ, প্ৰতিষ্ঠান ইতিমধ্যে ব্যক্তিগত খণ্ডৰ হাতত অৰ্পণ কৰিছে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে৷ কেন্দ্ৰীয় চৰকাৰৰ ৰাজহুৱা খণ্ডৰ ব্যক্তিগতকৰণৰ বিৰুদ্ধে ইতিমধ্যে দেশজুৰি প্ৰতিবাদ অব্যাহত আছে৷ অসমতো লোকপ্ৰিয় গোপীনাথ বৰদলৈ আন্তৰ্জাতিক বিমান বন্দৰো কেন্দ্ৰীয় চৰকাৰে গতাই দিছিল আদানীৰ হাতত৷ তেতিয়াও ৰাজ্যজুৰি উঠিছিল প্ৰতিবাদৰ জোৱাৰ৷ ৰাজ্যবাসীৰ প্ৰবল প্ৰতিবাদকো নেওচি অসমবাসীৰ আদৰৰ বিমান বন্দৰটো অৰ্পণ কৰা হৈছিল আদানীৰ হাতত৷ একেদৰে, মহানগৰীৰ মাজমজিয়াৰ ৫৮ বিঘা ৰে’লৱেৰ মাটিও অলপতে লীজত দিয়া হ’ল বহিৰাগত বণিয়াক ৷ এইদৰেই অসমৰ মাটিতে বঞ্চিত কৰি ৰখা হৈছে থলুৱা অসমীয়াক৷ আৰু এইবাৰ কেন্দ্ৰীয় চৰকাৰৰ টেলিকমিউনিকেশ্যন প্ৰতিষ্ঠান বিএছএনএল কৰ্তৃপক্ষৰ অসম মণ্ডল সাজু হৈছে ৰাজ্যৰ বিভিন্ন প্ৰান্তত অৱস্থিত বিএছএনএলৰ কাৰ্যালয়সমূহ ভাড়াত দিবলৈ৷ প্ৰথম পৰ্যায়ত ৰাজ্যখনত থকা বিএছএনএলৰ ২০টা ভৱন আৰু কাৰ্যালয়ৰ অংশ ভাড়াত দিয়া হ’ব বুলি জানিব পৰা গৈছে৷ তাৰ বাবে ইতিমধ্যে প্ৰস্তুতি আৰম্ভ কৰিছে বিএছএনএল কৰ্তৃপক্ষই৷ বিএছএনএল কৰ্তৃপক্ষই নিবিদা আহ্বান কৰিছে বুলিও জানিব পৰা গৈছে৷ আৰ্থিক সংকটৰ পৰা উদ্ধাৰ পাবলৈ বিএছএনএল কৰ্তৃপক্ষই কাৰ্যালয় ভাড়ালৈ দিবলগীয়া হোৱা ঘটনাত আশ্বৰ্য প্ৰকাশ কৰিছে সচেতন ৰাইজে৷ কিয়নো, এসময়ত লাভজনক ব্যৱসায়েৰে সুচাৰুৰূপে চলি থকা কেন্দ্ৰীয় চৰকাৰৰ এই দূৰসংযোগ প্ৰতিষ্ঠানটো ক্ৰমশ: দেউলীয়া হৈ পৰাৰ পাছত কেন্দ্ৰই ব্যক্তিগতকৰণৰ বাবে প্ৰস্তুতি আৰম্ভ কৰিছে৷ অসম মণ্ডল বিএছএনএল কৰ্তৃপক্ষই প্ৰকাশ কৰা জাননী অনুসৰি প্ৰথম পৰ্যায়ত মহানগৰীকে ধৰি ৰাজ্যৰ কেইবাটাও প্ৰান্তৰ কাৰ্যালয়ৰ অংশ ভাড়ালৈ দিয়া হ’ব৷ তাৰ ভিতৰত গুৱাহাটীৰ পাণবজাৰত থকা বিএছএনএল ভৱনৰ প্ৰথম, পঞ্চম আৰু ষষ্ঠ মহলা, একেটা স্থানতে থকা চি টি অ’ ভৱনৰ ভূমি আৰু দ্বিতীয় মহলা, দিছপুৰৰ ৱায়াৰলেছত থকা চিএছচি ভৱনৰ ভূমি, প্ৰথম আৰু দ্বিতীয় মহলা, সাতগাঁওস্থিত ইটিআৰ ভৱনৰ ভূমি আৰু প্ৰথম মহলা, হাজোৰ টেলিফোন কেন্দ্ৰৰ ভূমি আৰু প্ৰথম মহলা, তেজপুৰস্থিত ভৱনৰ ভূমি এলেকা, বিশ্বনাথ চাৰিআলিৰ এমবিএম কেন্দ্ৰৰ প্ৰথম মহলা, নগাঁৱৰ প্ৰশাসনীয় ভৱনৰ ভূমি আৰু প্ৰথম মহলা, নগাঁৱৰে টেলিফোন কেন্দ্ৰৰ ভূমি আৰু প্ৰথম মহলা, শিলচৰৰ প্ৰশাসনীয় ভৱনৰ ভূমি, প্ৰথম আৰু দ্বিতীয় মহলা, কৰিমগঞ্জৰ টেলিফোন কেন্দ্ৰৰ দ্বিতীয় মহলা, যোৰহাট ভৱনৰ ভূমি আৰু প্ৰথম মহলা, যোৰহাটৰে পুৰণি চিটিঅ’ গৃহৰ ভূমি এলেকা, যোৰহাটৰে টেলিফোন কেন্দ্ৰৰ প্ৰথম, দ্বিতীয়, তৃতীয় মহলা, গোলাঘাটৰ প্ৰশাসনীয় ভৱনৰ প্ৰথম, দ্বিতীয়, তৃতীয় মহলা, ডিব্ৰুগড়ৰ প্ৰশাসনীয় ভৱনৰ ভূমি এলেকা, তিনিচুকীয়াৰ টেলিফোন কেন্দ্ৰৰ প্ৰথম মহলা, বঙাইগাঁৱৰ পুৰণি অফিচ গৃহৰ ভূমি এলেকা, মানকাচৰ টেলিফোন কেন্দ্ৰৰ ভূমি এলেকা আৰু ধুবুৰী লন অফিচৰ ভূমি এলেকা আৰু প্ৰথম মহলা আদি৷ কেৱল অৰ্থ সংকটৰ বাবেই এনেদৰে এটা বৃহৎ চৰকাৰী প্ৰতিষ্ঠানে নিজৰ কাৰ্যালয় ভাড়ালৈ দিবলগীয়া হোৱা কাৰ্যক বহুজনে দুৰ্ভাগ্যজনক বুলি মন্তব্য কৰিছে৷ একেসময়তে, ৰাজহুৱা খণ্ডৰ সুচলাৱস্থা বজাই ৰখাত কেন্দ্ৰীয় চৰকাৰ আৰু প্ৰধানমন্ত্ৰী নৰেন্দ্ৰ মোদীৰ ব্যৰ্থতাও সমালোচিত হৈছে৷ এপদ এপদকৈ দেশৰ সম্পদ বিক্ৰী হৈ গৈ থাকিলে দেশৰ সম্ভাৱ্য জটিল সামাজিক ভৱিষ্যতলৈও উদ্বিগ্ন হৈ পৰিছে দেশবাসী৷