ডিজিটেল ডেস্ক: আজি বিশ্ব ডায়েবেটিছ দিৱস৷ ডায়েবেটিছ দিৱসৰ আছে সুকীয়া ইতিহাস আৰু তাৎপৰ্য৷ ১৯৯১ চনত আন্তৰ্জাতিক ডায়েবেটিছ ফাউণ্ডেচন (আইডিএফ) আৰু বিশ্ব স্বাস্থ্য সংস্থাৰ দ্বাৰা বিশ্ব ডায়েবেটিছ দিৱস পালনৰ চিন্তাৰ উন্মেষ ঘটিছিল৷ এই ৰোগৰ বৰ্ধিত স্বাস্থ্য ভাবুকিৰ বৰ্ধিত উদ্বেগৰ প্ৰতিক্ৰিয়া হিচাপে এই দিৱস পালনৰ চিন্তা কৰা হৈছিল৷
২০০৬ত ৰাষ্ট্ৰসংঘৰ দ্বাৰা বিশ্ব ডায়েবেটিছ দিৱসক আনুষ্ঠানিকভাৱে স্বীকৃতি দিয়া হৈছিল আৰু এই সন্দৰ্ভত এটা প্ৰস্তাৱ গৃহীত হৈছিল।
বিশ্বত এতিয়া ডায়েবেটিছ দ্ৰুতগতিত বিয়পি পৰিছে৷ আধুনিক মানুহৰ আমাৰ জীৱনশৈলী আৰু আহাৰ প্ৰণালীয়ে হৈছে এই ৰোগ বিয়পাৰ প্ৰাথমিক কাৰণ। ডায়েবেটিছ হৈছে এক জীৱনজোৰা ৰোগ, এই ৰোগত আক্ৰান্ত ৰোগীসকলে তেওঁলোকৰ স্বাস্থ্যৰ প্ৰতি বিশেষ নজৰ দিব লাগিব।
ডায়েবেটিছ ৰোগীৰ বাবে, ব্যায়াম আহাৰৰ দৰেই গুৰুত্বপূৰ্ণ। শাৰীৰিক অনুশীলন কৰি ডায়েবেটিছ নিয়ন্ত্ৰণত ৰাখিব পাৰি। ব্যায়ামে ইনচুলিনৰ প্ৰতি শৰীৰৰ সংবেদনশীলতা বৃদ্ধি কৰে, আৰু ইনচুলিন-প্ৰতিৰোধী প্ৰৱণতা হ্ৰাস কৰে।
ডায়েবেটিছৰ লক্ষণসমূহ কেনেধৰণৰ:
ডায়েবেটিছ থকা লোকৰ শৰীৰত বিভিন্ন উপসৰ্গই দেখা দিয়ে৷ সেইসমূহ এনেধৰণৰ-
১) ঘনাই প্ৰস্ৰাৱ হোৱা (আনকি নিশাও)
২) ছালত খজুৱতি হোৱা
৩) দৃষ্টিৰ ধূসৰতা
৪) আলস্য আৰু দুৰ্বলতা
৫) ভৰি জিনজিনোৱা অথবা অৱস হোৱা
৬) অতিপাত পিয়াহ লগা
৭) কটা অংশ বা ঘাঁ শুকাওঁতে বেছি দিন লগা
৮) প্ৰতি মুহূৰ্ততে ভোক লগা
৯) ওজন কমি যোৱা
১০) ছালত সংক্ৰমণ
ডায়েবেটিছ নিয়ন্ত্ৰণ কৰাৰ উপায় কি?
ডায়েবেটিছত আক্ৰান্তসকলে চিকিৎসকে দিয়া পৰামৰ্শমতে খাদ্য, ব্যায়াম, পৰিচ্ছন্নতা বিধি, ইনচুলিন বেজী বা বড়ি আদিৰে ৰোগ নিয়ন্ত্ৰণত ৰাখি সম্ভাৱ্য জটিলতাৰ পৰা আঁতৰি থাকিব পাৰে।
ব্যায়ামৰ ভূমিকা: ব্যায়ামে তেজত থকা চেনিৰ পৰিমাণ কমাই দিয়ে। গ্লুকজ ব্যৱহাৰ কৰাৰ শৰীৰৰ সক্ষমতা বৃদ্ধি কৰে। ঘন্টাত ৬ কিলোমিটাৰ বেগেৰে খোজ কাঢ়িলে ৩০ মিনিটত প্ৰায় ১৩৫ কেল’ৰি দহন হয় আৰু চাইকেল চলালে ২০০ কেল’ৰি দহন হয়।
ডায়েবেটিছত ছালৰ যত্ন কেনেকৈ ল’ব?
ডায়েবেটিছ থকা ৰোগীয়ে ছালৰ যত্ন লোৱাটো অতি প্ৰয়োজনীয় কথা। অধিক পৰিমাণৰ গ্লুকজ থকাৰ বাবে ছাল বহু বেক্টেৰিয়া আৰু ভেঁকুৰৰ বাবে উপযুক্ত প্ৰজনন ক্ষেত্ৰ হৈ পৰে। ৰক্ত সঞ্চালন দূৰ্বল হোৱাৰ বাবে শৰীৰে এনে ক্ষতিকাৰক বেক্টেৰিয়াবোৰক ধ্বংস কৰিবলৈ সক্ষম নহয়। উচ্চ পৰিমাণৰ গ্লুকজে শৰীৰত ডিহাইড্ৰেছনৰ সৃষ্টি কৰে, ফলত ছাল শুকান আৰু খহতা হৈ পৰে।
Continue Reading
