ৰাকেশ টিকাইটলৈ লণ্ডনৰ '২১ শতিকা আইকন বঁটা

ডিজিটেল ডেস্ক: ৰাকেশ টিকাইট আৰু এক বিদ্ৰোহ। বিশ্বৰ দৃষ্টি নিবদ্ধ হোৱা ভাৰতৰ কৃষি বিদ্ৰোহ৷ যি বিদ্ৰোহৰ অগ্নিশিখাই ভেটি কঁপাই তুলিলে বিজেপিৰ৷ যাৰ ফলত আসন্ন উত্তৰ প্ৰদেশ, পঞ্জাব বিধানসভা নিৰ্বাচনত পৰাজয়ৰ শংকাত বাতিল কৰিবলৈ বাধ্য হ’ল কৃষি আইন তিনিখন৷ সংসদত কৃষি আইন তিনিখন প্ৰত্যাহাৰৰ বাবে বিধেয়ক গৃহীত হোৱাৰ পাছতো কৃষক আন্দোলনৰ গুৰি ধৰোঁতা ৰাকেশ টিকাইটে মন্তব্য কৰিছে যে কৃষক আন্দোলনত অংশ লোৱা কৃষকসকলৰ ওপৰত জাপি দিয়া সকলো গোচৰ প্ৰত্যাহাৰ নকৰাপৰ্যন্ত এই আন্দোলন বন্ধ নকৰে ভাৰতীয় কিষাণ ইউনিয়নে৷ ৰাকেশ টিকাইটৰ দৃঢ় মত আৰু স্থিতিয়ে দেশৰ গণতান্ত্ৰিক প্ৰমূল্যত বিশ্বাসী প্ৰতিগৰাকী নাগৰিককে মুগ্ধ কৰিছে৷

ভাৰতীয়া কিষাণ ইউনিয়নৰ ৰাষ্ট্ৰীয় প্ৰবক্তা ৰাকেশ টকাইটৰ নাম অন্তৰ্ভুক্ত হৈছে লণ্ডনৰ '২১ শতিকাৰ আইকন' বঁটাৰ অন্তিম তালিকাত। ভাৰতীয় কিষাণ ইউনিয়নৰ উত্তৰ প্ৰদেশৰ উপাধ্যক্ষ ৰাজবীৰ সিঙে জনায় যে, এই বঁটা ১০ ডিচেম্বৰত আগবঢ়োৱা হ'ব। এক সংবাদ মাধ্যমে জনোৱা অনুসৰি টিকাইট প্ৰতিবাদত ব্যস্ত থকা বাবে উক্ত বঁটা প্ৰদান অনুষ্ঠানলৈ যাব নোৱাৰে। কৃষকৰ দাবী মানি ল'লেহে তেওঁ পুৰষ্কাৰ গ্ৰহণ কৰিব বুলিও জনায়।