ডিজিটেল ডেস্কঃ ইজৰাইল-পেলেষ্টাইনৰ মাজৰ যুঁজ খন অধিক ভয়ংকৰ হৈ উঠাৰ আশংকাই দেখা দিছে। ইজৰাইলৰ সেনাই গাজাৰ পৰা হামাছ সন্ত্ৰাসবাদীক পুলিয়ো-পোখাই উভালিবলৈ দৃঢ় প্ৰতিজ্ঞ হৈছে। ইজৰাইলক গাজাত আক্ৰমণ চলোৱাত সহায় কৰিবলৈ আগবাঢ়ি আহিছে আমেৰিকা। গাজাত সংঘৰ্ষ ক্ৰমান্বয়ে ভয়াৱহ হৈ পৰিছে।
যুদ্ধৰ ডাৱৰ গাঢ় হৈ আহিছে। ইজৰাইলী সামৰিক বাহিনীয়ে গাজাৰ অসামৰিক লোকসকলক আৰু তাত নিয়োজিত ৰাষ্ট্ৰসংঘৰ বিষয়াসকলক ২৪ ঘণ্টাৰ ভিতৰত দক্ষিণৰ সুৰক্ষিত স্থানলৈ যাবলৈ কৈছে। কিন্তু ৰাষ্ট্ৰসংঘই প্ৰকাশ কৰা মতে এয়া অসম্ভৱ। ৰাষ্ট্ৰসংঘই কৈছে যে ইজৰাইলৰ এনে পদক্ষেপ মাৰাত্মক হ'ব পাৰে। ইফালে, ইৰাণে কৈছে যে তেওঁলোকে গাজা ষ্ট্ৰিপত ভৱিষ্যতৰ আক্ৰমণৰ প্ৰতি লক্ষ্য ৰাখি ইজৰাইলৰ বিৰুদ্ধে এক নতুন সৈন্য বাহিনী খোলাৰ কথা বিবেচনা কৰি আছে।
ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে হামাছৰ আক্ৰমণ প্ৰতিৰোধ কৰিবলৈ একপ্ৰকাৰৰ যুদ্ধৰ আহ্বান জনাইছে। তেওঁৰ এনে স্থিতিৰ পিছতে হামাছে প্ৰতিবাদ জনাই এক বিবৃতি জাৰি কৰিছে। ইজৰাইলী সামৰিক বাহিনীয়ে কৈছে যে গাজাৰ অসামৰিক লোকসকলে তেওঁলোকৰ ব্যক্তিগত সুৰক্ষা নিশ্চিত কৰিবলৈ দ্ৰুতগতিত নিজৰ ঘৰ এৰি যাবলৈ পৰামৰ্শ দিছে।
ইপিনে ৰাষ্ট্ৰসংঘই ইজৰাইলক আদেশটো প্ৰত্যাহাৰ কৰিবলৈ আহ্বান জনাইছে। ৰাষ্ট্ৰসংঘই কৈছে যে সকলো গাজাবাসীক এনেদৰে অঞ্চলটোৰ পৰা স্থানান্তৰ কৰাটো অসম্ভৱ।
ইফালে, ইৰাণৰ বৈদেশিক মন্ত্ৰী হোছেইন আমিৰ-আব্দাল্লাহিয়াই কয়, "আমাক বহু দেশে যোগাযোগ কৰিছে আৰু ইজৰাইলৰ বিৰুদ্ধে এক নতুন মৰ্চা গঠনৰ আহ্বান জনোৱা হৈছে।"তেওঁ লগতে কয় যে সেই সম্ভাৱনা ভৱিষ্যতে গাজাত ইজৰাইলৰ কাৰ্যকলাপৰ ওপৰত নিৰ্ভৰ কৰিব।
Continue Reading
