ডিজিটেল ডেস্ক: দেশৰ ৰাজনীতিত পুনৰ উত্থাপন হৈছে নাগৰিকত্ব (সংশোধনী) আইনৰ প্ৰসংগ৷ কেৰালাৰ মুখ্যমন্ত্ৰী পিনাৰাই বিজয়নে কালি দৃঢ়তাৰে কয় যে তেওঁৰ চৰকাৰে বিতৰ্কিত নাগৰিকত্ব (সংশোধনী) আইন (চিএএ) কাৰ্যকৰী নকৰে। কেৰালা
চৰকাৰৰ প্ৰথম বৰ্ষপূৰ্তি উদযাপনৰ সমাপ্তি উপলক্ষে আয়োজিত এক অনুষ্ঠানত ভাষণ দি তেওঁ কয়, নাগৰিকত্ব সংশোধনী আইন (চিএএ) সন্দৰ্ভত চৰকাৰৰ স্পষ্ট স্থিতি আছে। আৰু সেই স্থিতি অব্যাহত থাকিব।
মুখ্যমন্ত্ৰীগৰাকীয়ে কয় যে ভাৰতৰ সংবিধানত উল্লেখ কৰা অনুসৰি আমাৰ দেশ ধৰ্মনিৰপেক্ষতাৰ নীতিৰ আধাৰত পৰিচালিত৷ আজিকালি ধৰ্মনিৰপেক্ষতাক ধ্বংস কৰাৰ চেষ্টা চলাই থকা হৈছে। দেশৰ এটা নিৰ্দিষ্ট গোট এই বিষয়ে যথেষ্ট চিন্তিত। শেহতীয়া এটা ঘটনাত, কিছুমান লোকে ধৰ্মৰ আধাৰত নাগৰিকত্ব নিৰ্ধাৰণ কৰি আছিল। কেৰালা চৰকাৰে এই ঘটনাৰ বিৰুদ্ধে দৃঢ় স্থিতি গ্ৰহণ কৰিছে।
তেওঁ লগতে কয়, নাগৰিকৰ মাজত সাম্প্ৰদায়িক উত্তেজনা সৃষ্টি কৰিবলৈ দেশৰ বিভিন্ন প্ৰান্তত কেইবাটাও প্ৰচেষ্টা চলিছে৷ কিন্তু ইয়াত, আমাৰ সমাজৰ আটাইতকৈ দৰিদ্ৰ পৰিয়ালবোৰ চিনাক্ত কৰিবলৈ এটা জৰীপ সম্পূৰ্ণ কৰা হৈছে। এই জৰীপৰ অংশ হিচাপে পৰৱৰ্তী পদক্ষেপ লোৱা হ’ব৷
এলডিএফ চৰকাৰৰ প্ৰথম বৰ্ষপূৰ্তি উদযাপনত ভাষণ প্ৰদান কৰি কেৰালাৰ মুখ্যমন্ত্ৰী পিনাৰাই বিজয়নে পুনৰ কয় যে ৰাজ্যখনে নাগৰিকত্ব (সংশোধনী) আইন কাৰ্যকৰী নকৰে৷ ৰাজ্য চৰকাৰে এক দৃঢ় স্থিতি গ্ৰহণ কৰিছে যে ধৰ্মৰ ওপৰত ভিত্তি কৰি নাগৰিকত্ব নিৰ্ধাৰণ কৰা নহ’ব৷
যোৱা মাহত কেন্দ্ৰীয় গৃহমন্ত্ৰী অমিত শ্বাহে পশ্চিম বংগৰ শিলিগুৰিত কৈছিল যে ক’ভিড-১৯ মহামাৰী সমাপ্ত হোৱাৰ পাছত আইনখন কাৰ্যকৰী কৰা হ’ব বুলি মন্তব্য কৰিছিল৷
নাগৰিকত্ব (সংশোধনী) আইন, ২০১৯ ভাৰতৰ সংসদৰ দ্বাৰা ২০১৯ৰ ১১ ডিচেম্বৰত গৃহীত হৈছিল৷ কিন্তু এতিয়াও কাৰ্যকৰী হোৱা নাই৷ এই আইনৰ উদ্দেশ্য হৈছে আফগানিস্তান, বাংলাদেশ আৰু পাকিস্তানত উৎপীড়নৰ সন্মুখীন হোৱা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টান সম্প্ৰদায়ৰ সদস্যসকলক নাগৰিকত্ব প্ৰদান কৰা।
Continue Reading
