ডিজিটেল ডেস্ক: এটা ভয়ংকৰ ঘটনা৷ সভ্য সমাজক কলংকিত কৰা এই ঘটনাই শিহৰিত কৰিব আপোনাক৷ এজন আৰক্ষী বিষয়াৰ বিকৃত কামনাৰ বলি এটি কন্যাশিশু৷ মাত্ৰ চাৰি বছৰীয়া এই শিশুটিৰ মুখৰ হাঁহি কাঢ়িলে আৰক্ষী বিষয়াগৰাকীয়ে৷
ৰাজস্থানৰ দৌচাত এটি ৪ বছৰীয়া কন্যাশিশুক ধৰ্ষণ কৰা হৈছে৷ আৰু এই নাৰকীয় কাণ্ডত অভিযুক্ত এজন আৰক্ষী উপ-পৰিদৰ্শকক গ্ৰেপ্তাৰ কৰা হৈছে৷ শুকুৰবাৰে দৌচা জিলাত আৰক্ষী উপ-পৰিদৰ্শকগৰাকীয়ে এটি চাৰি বছৰীয়া শিশুক ধৰ্ষণ কৰাৰ অভিযোগ উত্থাপিত হৈছে।
বিৱৰণ অনুসৰি, ঘটনাটো জিলাখনৰ লালষ্ট অঞ্চলত সংঘটিত হৈছিল৷ ভূপেন্দ্ৰ সিং নামৰ অভিযুক্ত উপ-পৰিদৰ্শকগৰাকীয়ে আবেলি তেওঁৰ কোঠালৈ শিশুটিক লৈ গৈ প্ৰলোভিত কৰি ধৰ্ষণ কৰিছিল৷
এএছপি ৰামচন্দ্ৰ সিং নেহৰাই সংবাদ মাধ্যমত সদৰী কৰিছে এই তথ্য৷ তেওঁ লগতে কৈছিল যে অভিযুক্তজনক গ্ৰেপ্তাৰ কৰাৰ পাছত জেৰা কৰা হৈছিল।
ইফালে, স্থানীয় লোকসকলে এই ঘটনাৰ প্ৰতিবাদত আৰক্ষীৰ বিৰুদ্ধে শ্ল’গান দি ৰাহুৱাছ আৰক্ষী থানা ঘেৰাও কৰি পৰিৱেশ উত্তাল কৰি তোলে। আনকি, আনুষ্ঠানিকভাৱে আৰক্ষীৰ হাতত গতাই দিয়াৰ পূৰ্বে অভিযুক্ত উপ-পৰিদৰ্শকজন গণপ্ৰহাৰৰো সন্মুখীন হৈছিল৷
ভাৰতীয় জনতা পাৰ্টিৰ সাংসদ কিৰোদি লাল মীনায়ো ঘটনাস্থলীত উপস্থিত হৈ কয়, লালষ্টত এজন আৰক্ষীয়ে এগৰাকী দলিত ছোৱালীক ধৰ্ষণ কৰাৰ ঘটনাক লৈ ৰাইজৰ মাজত যথেষ্ট ক্ষোভ দেখা গৈছে। মই নিৰীহ শিশুটোক ন্যায় দিবলৈ ঘটনাস্থলীত উপস্থিত হৈছোঁহি৷
অভিযুক্ত এএছআই ভূপেন্দ্ৰ সিঙে কঠোৰ ব্যৱস্থাৰ সন্মুখীন হৈছে, আৰু শীঘ্ৰেই তেওঁক চাকৰিৰ পৰা বৰ্খাস্ত কৰা হ’ব, মীনাই লগতে কয়।
Continue Reading
