বিপদত অনলাইন গেমিং কোম্পানী! গৃহমন্ত্ৰীক প্ৰস্তাৱিত নিষেধাজ্ঞাৰ সন্দৰ্ভত হস্তক্ষেপৰ আহ্বান

ডিজিটেল ডেস্ক : শেহতীয়াকৈ অনলাইন গেমিং বিলখন কেবিনেটে অনুমোদন জনাইছে। ইয়াৰ উদ্দেশ্য হৈছে এনে প্লেটফৰ্মসমূহক ৰোধ কৰা, যিয়ে অনলাইন জুৱাৰ প্ৰচাৰ কৰে। এই বিধেয়কৰ জৰিয়তে চৰকাৰে বেটিং এপসমূহৰ ওপৰত নিয়ন্ত্ৰণ ৰাখিব বিচাৰিছে।

চৰকাৰৰ এই পদক্ষেপে অনলাইন গেমিং কোম্পানীক বিপদত পেলাইছে। অল ইণ্ডিয়া গেমিং ফেডাৰেচন (এ আই জি এফ), ই-গেমিং ফেডাৰেচন (ই জি এফ) আৰু ফেডাৰেচন অৱ ইণ্ডিয়ান ফেণ্টাচি স্প’ৰ্টছ (এফ আই এফ এছ)য়ে কেন্দ্ৰীয় গৃহমন্ত্ৰী অমিত শ্বাহলৈ এখন পত্ৰ লিখি বিধেয়কখনৰ ওপৰত হস্তক্ষেপৰ দাবী জনাইছে।

এই উদ্যোগৰ সৈতে জড়িত বৃহৎ বিষয়াসকলেও চৰকাৰৰ সৈতে শীঘ্ৰে বৈঠকত মিলিত হোৱাৰ অনুৰোধ জনাইছে। তেওঁলোকে কয় যে যদি এই বিধেয়কখন গৃহীত হয় তেন্তে ভাৰতীয় ব্যৱহাৰকাৰীসকলৰ যথেষ্ট ক্ষতি হ’ব।

এক প্ৰতিবেদন অনুসৰি এআইজিএফে যুক্তি দিছে যে ইয়াৰ ফলত কোটি কোটি গেমাৰে অন্যান্য অবৈধ বেটিং প্লেটফৰ্ম আৰু অপাৰেটৰৰ ফালে গতি কৰিব। ইয়াৰ বাহিৰেও কোটি কোটি লোকক কৰ্মসংস্থাপন প্ৰদান কৰা এই দ্ৰুতগতিত বৃদ্ধি পোৱা উদ্যোগটোৰ বাবে ই এক এলাৰ্ম বেলতকৈও কম নহয়। উল্লেখ্য যে অনলাইন গেমিং উদ্যোগে প্ৰধানমন্ত্ৰী মোদীৰ ১ ট্ৰিলিয়ন ডলাৰৰ ডিজিটেল অৰ্থনীতিক সহায় কৰিব পাৰে।

বাজিত লাখ লাখ কৰ্মসংস্থাপন

চৰকাৰলৈ লিখা পত্ৰখনত কোৱা হৈছে যে নিয়ন্ত্ৰিত আৰু দায়িত্বশীল ভাৰতীয় প্লেটফৰ্ম বন্ধ কৰি কোটি কোটি খেলুৱৈয়ে অবৈধ মাটকা নেটৱৰ্ক আৰু বিদেশী জুৱাৰ ৱেবছাইট ব্যৱহাৰ কৰিবলৈ আৰম্ভ কৰিব। কোনো ধৰণৰ সুৰক্ষা ব্যৱস্থা আৰু কৰ আদায় নকৰাকৈ কাম কৰা অবৈধ অপাৰেটৰৰ হাতলৈ যাব ব্যৱহাৰকাৰীৰ নিৰাপত্তা।

উদ্যোগ বিশেষজ্ঞসকলেও সকীয়াই দিছে যে ইয়াৰ ফলত ৪ লাখ কোম্পানী, ২ লাখ চাকৰি, ২৫০০০ কোটি টকাৰ বিনিয়োগ আৰু বাৰ্ষিক ২০০০ কোটি টকাৰ জি এছ টি সংগ্ৰহৰ বাবেও ভাবুকিৰ সৃষ্টি হ’ব পাৰে। এই বিধেয়কখনে অনলাইন গেমিং প্লেটফৰ্মসমূহক আইনী কাঠামোৰ অধীনলৈ অনা আৰু ডিজিটেল এপৰ জৰিয়তে বাজিৰ ওপৰত জৰিমনা বিহাৰ কথা কয়।

গেমিং ফেডাৰেচনৰ তথ্য অনুসৰি অনলাইন স্কিল গেমিং হৈছে এক দ্ৰুতগতিত বৃদ্ধি পোৱা খণ্ড, যাৰ মূল্য ২ লাখ কোটি টকাৰ ওপৰত আৰু ৰাজহ ৩১ হাজাৰ কোটি টকাৰ ওপৰত। ইয়াৰ ফলত চৰকাৰে ২০ হাজাৰ কোটি টকাৰ বাৰ্ষিক কৰৰো সুবিধা লাভ কৰে। অনাগত সময়ত এই খণ্ডটো ২০ শতাংশ CAGR ৰে বৃদ্ধি পাব আৰু ২০২৮ চনৰ ভিতৰত ই দুগুণ হ’ব পাৰে।দেশত মুঠ অনলাইন গেমাৰৰ সংখ্যা ২০২০ চনত ৩৬ কোটিৰ পৰা ২০২৪ চনলৈ ৫০ কোটিৰো অধিকলৈ বৃদ্ধি পাইছে।

এই নতুন নিয়মৰ অধীনত সকলো ডিজিটেল আৰু মিডিয়া প্লেটফৰ্মত বেটিং এপৰ বিজ্ঞাপন সম্পূৰ্ণৰূপে নিষিদ্ধ কৰা হ’ব। ইয়াৰ উপৰিও গেমিং এপ প্ৰচাৰ কৰা চেলিব্ৰিটি আৰু প্ৰভাৱশালী লোকৰ বিৰুদ্ধে কঠোৰ আইনী ব্যৱস্থা গ্ৰহণৰ কথাও চৰ্চা হৈছে।