ডিজিটেল ডেস্কঃ অপেক্ষাৰ অন্তত আজি অৰ্থাৎ শনিবাৰে আপৰ ৰাজ্যিক সমিতিৰ নেতৃত্ব সলনি কৰিছে ৰাষ্ট্ৰীয় সমন্বয়ক সমিতিয়ে ৷ নতুন ৰাজ্যিক সভাপতি নিযুক্তি দিছে ৰাষ্ট্ৰীয় সমিতিয়ে ৷ মনোজ ধানোৱাৰক অসমৰ ৰাজ্যিক সভাপতিৰ দায়িত্ব প্ৰদান কৰিছে ৷ পূৰ্বে ৰাজ্যিক সভাপতি আছিল ভবেন চৌধুৰী ৷
ভবেন চৌধুৰীক পদোন্নতি দি ৰাষ্ট্ৰীয় যুটীয়া সম্পাদকৰ দায়িত্ব প্ৰদান কৰিছে ৷ সৰ্বভাৰতীয় সমিতিয়ে অসমৰ ৰাজ্যিক আপৰ নেতৃত্ব সলনি কৰি মনোজ ধানোৱাৰক সভাপতিৰ দায়িত্ব দি সাংগঠনিক দিশ শক্তিশালী কৰাৰ লক্ষ্য লৈছে ৷ কিন্তু যিগৰাকী ধানোৱাৰক দায়িত্ব প্ৰদান কৰিছে সেইগৰাকী ধানোৱাৰে বিগত লোকসভা নিৰ্বাচনত ডিব্ৰুগড় সংসদীয় সমষ্টিত ২ লাখ ভোটো লাভ নকৰিলে ৷ মাথো ১ লাখ ৩৭ হাজাৰ ভোট লাভ কৰিছিল তেওঁ৷ উল্লেখ্য যে আপ অসমৰ নেতৃত্বক লৈ দীৰ্ঘদিন ধৰি প্ৰশ্নৰ সন্মুখীন হৈ আহিছিল দলটো ।
একাংশ নেতা-কৰ্মীয়ে ভৱেন চৌধুৰীৰ কাম-কাজক লৈ মুকলি কৈ অসন্তুষ্টি ব্যক্ত কৰি আহিছিল যদিও কেন্দ্ৰীয় নেতৃত্বই তেনে কথাত কাণসাৰ দিয়া নাছিল।
অসমৰ আগন্তুক পঞ্চায়ত আৰু বিধানসভা নিৰ্বাচনৰ প্ৰতি লক্ষ্য ৰাখি আপে এই গুৰুত্বপূৰ্ণ ঘোষণা কৰিছে । অসমত দলৰ ভেঁটি শক্তিশালী কৰাৰ ক্ষেত্ৰত দলে তেওঁৰ পৰা বিশেষ আশা কৰাও দেখা গৈছে । নিবনুৱা সমস্যা, স্মাৰ্ট মিটাৰ, জনগোষ্ঠীয় সমস্যাৰ সমাধান, চাহ শ্ৰমিকৰ মজুৰি বৃদ্ধি, মাটিৰ পট্টা আদিত গুৰুত্ব প্ৰদান কৰিব বুলি জনসাধাৰন আশাবাদী ৷ ইয়াৰ ওপৰিও অন্যান্য বিৰোধী দলৰ সৈতে ঐক্যবদ্ধ যুঁজৰ বাবে প্ৰস্তুত মনোজ ধানোৱাৰ ৷
Continue Reading
