ডিজিটেল ডেস্ক: ধৰ্মীয় অসহিষ্ণুতা দিনে দিনে বৃদ্ধি পাই গৈ আছে। ধৰ্মৰ স্বাধীনতা দিনে দিনে যেন হেৰাই গৈছে। ধৰ্মক কেন্দ্ৰ কৰি নিত্য-নতুন বিতৰ্কৰ সৃষ্টি হৈছে। শেহতীয়া হিজাব বিতৰ্ক, হালাল মাংসৰ বিতৰ্ক, লাউডস্পীকাৰ বিতৰ্ক আদি এনে অসহিষ্ণুতাৰ একো একোটা উদাহৰণ। ৰাম নৱমীৰ দিনাই পুনৰ আন এটা ঘটনা পোহৰলৈ আহিছে।
ৰাম নৱমী উপলক্ষে এজন ব্যক্তিয়ে মছজিদৰ দেৱালত হিন্দুত্বৰ প্ৰতীক হিচাপে গেৰুৱা পতাকা উত্তোলন কৰা দেখা গৈছিল। সেই ঘটনাৰ এটা ভিডিঅ' ইতিমধ্যে ছচিয়েল মিডিয়াত ভাইৰেল হৈ পৰা দেখা গৈছে। ভিডিঅ'টোত দেখা মতে, এজন ব্যক্তিয়ে বিহাৰৰ মুজাফৰপুৰত মছজিদৰ দেৱালত উঠি গেৰুৱা পতাকা উত্তোলন কৰি আছিল। ভিডিঅ'টোত লগতে আন একাংশ লোকক হাতত উন্মুক্ত তৰোৱাল, হকী ষ্টিক লৈ উত্তেজিত অৱস্থাত দেখা গৈছিল। বাইক আৰোহী, হাতত তৰোৱাল আৰু হকী ষ্টিক লৈ থকা বহুসংখ্যক মানুহে দেৱাল বগাই গেৰুৱা পতাকা উত্তোলন কৰিবলৈ যোৱা ব্যক্তিজনক উৎসাহিত কৰা স্পষ্ট ৰূপত প্ৰকাশ পাইছে ভিডিঅ'টোত।
ৰাম নৱমী উদযাপন কৰি থকা সময়ত একাংশ লোকে এটা শোভাযাত্ৰা উলিয়াইছিল আৰু এই শোভাযাত্ৰা মহম্মদপুৰ গাঁৱৰ ডাক বাংলা মছজিদৰ সন্মুখত ৰৈ এই ঘটনাটো সংঘটিত কৰিছিল। ইতিমধ্যে এই ঘটনা সন্দৰ্ভত এখন এজাহাৰ দাখিল কৰা হৈছে। এই কথা নিশ্চিত কৰিছে এছএছপি মুজাফ্ফৰপুৰ জয়ন্ত কান্তে নামৰ বিষয়াজনে। কিন্তু ঘটনা সন্দৰ্ভত এতিয়ালৈকে কোনো ব্যক্তি গ্ৰেপ্তাৰ হোৱা নাই।
Continue Reading
