ডিজিটেল ডেস্কঃ সুৰাৰ ৰাগীত মাতাল হৈ মানুহে কি কি যে নকৰে। মাতাল মানুহে কেতিয়াবা এনে কিছুমান কাম কৰে যি আলোচনাৰ বিষয় হৈ পৰে। সকলো সীমা পাৰ কৰি মদৰ নিচাত বিয়াকে পাতি পেলালে দুজন পুৰুষে। তেলেংগানাত ঘটিছে এই ঘটনা।
দুই সুৰাসক্ত পুৰুষৰ এজনৰ বয়স ২১ বছৰ আৰু আনজনৰ বয়স ২২ বছৰ। দুমাপালাপেট গাঁৱৰ এখন দোকানত দুয়োজন চিনাকি হৈ হৈছিল আৰু বন্ধু হৈ পৰিছিল। তাৰপাছত তেওঁলোকে প্ৰায়ে মদ খাবলৈ লগ হৈছিল। এদিন দুয়ো মদ খাই ইমানেই মাতাল হল যে নিজে কব নোৱাৰাকৈয়ে এটা মন্দিৰত উপস্থিত হৈ দুয়ো বিবাহপাশত আৱদ্ধ হয়।
মন্দিৰত সেই সময়ত পূজাৰী বা কোনো ভক্ত উপস্থিত নাছিল। কিছুদিনৰ পাছত ২১ বছৰীয়া যুৱকজন ২২ বছৰীয়া যুৱকজনৰ ঘৰলৈ যায় আৰু তেওঁৰ পিতৃ-মাতৃক কয় যে ''আপোনাৰ ল'ৰাটোৰ লগত মোক থাকিবলৈ দিয়ক। মোৰ থকাৰ কোনো ঠাই নাই। মই এইটো ঘৰতে থাকিম।''
হাজাৰবাৰ অনুৰোধ কৰা স্বত্বেও যুৱকজনৰ পিতৃ-মাতৃয়ে ইজন যুৱকক ঘৰত প্ৰৱেশ কৰিবলৈ অনুমতি নিদিলে। বহু তৰ্ক-বিতৰ্কও হ'ল। এবাৰ যুৱকজনে ক'লে যে ''আমি বিয়া পাতিছো আমাক একেলগে থাকিবলৈ দিয়ক।'' কোনো কাৰণতে ঘৰত এক খোজো প্ৰৱেশ কৰিবলৈ নিদিলে ২২ বছৰীয়া যুৱকজনৰ পিতৃ-মাতৃয়ে। অৱশেষত ২১ বছৰীয়া যুৱকজন আৰক্ষী চকীলৈ যায়।
তেওঁ আৰক্ষীক অভিযোগ কৰি কয় যে যদি তেওঁ আঁতৰি যাব লাগে তেন্তে ল'ৰাজনৰ পিতৃ-মাতয়ে তেওঁক ১ লাখ টকা দিব লাগিব। আৰক্ষীয়ে বিষয়টো বিবেচনা কৰাৰ পাছত ২২ বছৰীয়া যুৱকজনৰ পৰিয়ালৰ পৰা ১০,০০০ টকাৰ এককালীন নিষ্পত্তিৰ বাবে সন্মত হয় ২১ বছৰীয়া যুৱকজন। ১০,০০০ টকা লোৱাৰ পাছত দুয়োপক্ষৰ সন্মতিত দুই যুৱক পৃথক হয়। এই ঘটনাই সমগ্ৰ অঞ্চলতে চাঞ্চল্য সৃষ্টি কৰাৰ লগতে আমোদৰো সৃষ্টি কৰিছে।
Continue Reading
