শান্তি চুক্তিত স্বাক্ষৰ আমেৰিকা-ইৰানৰ; মুকলি হ’ব হৰমুজ প্ৰণালী, স্বস্তিৰ নিঃশ্বাস বিশ্বৰ

ডিজিটেল ডেস্ক: আমেৰিকা আৰু ইৰানৰ মাজত বিগত চাৰিটা মাহে চলি থকা তীব্ৰ সামৰিক উত্তেজনা আৰু সংঘাতৰ অৱশেষত অন্ত পৰিল। আক্ৰমণ-প্ৰত্যাক্ৰমণৰ ধাৰাবাহিকতা এৰি দুয়োখন দেশে অৱশেষত শান্তিৰ পথ বাছি লৈছে। ফ্ৰান্সৰ ঐতিহাসিক ভাৰ্ছাই মহলত অনুষ্ঠিত এক বিশেষ অনুষ্ঠানত আমেৰিকাৰ ৰাষ্ট্ৰপতি ড'নাল্ড ট্ৰাম্প আৰু ইৰানৰ ৰাষ্ট্ৰপতিয়ে এই গুৰুত্বপূৰ্ণ শান্তিপূৰ্ণ বুজাবুজি চুক্তিত স্বাক্ষৰ কৰে। চুক্তি সম্পন্ন কৰাৰ পিছতেই ৰাষ্ট্ৰপতি ট্ৰাম্পে অতি উলাহেৰে সংবাদ মাধ্যমৰ আগত ঘোষণা কৰে— "It's Signed!" (অৰ্থাৎ চুক্তিত স্বাক্ষৰ কৰা হ’ল)। সমগ্ৰ বিশ্বৰে চকু থকা এই ঐতিহাসিক ঘটনাই এতিয়া অশান্ত মধ্যপ্ৰাচ্যলৈ নতুন আশা কঢ়িয়াই আনিছে।

এই শান্তি চুক্তিত মুঠ ১৪টা অতি গুৰুত্বপূৰ্ণ বিষয় অন্তৰ্ভুক্ত কৰা হৈছে, যাৰ ভিতৰত আটাইতকৈ ডাঙৰ পদক্ষেপটো হৈছে তাৎক্ষণিক যুদ্ধবিৰতি। চুক্তি অনুসৰি, দুয়োপক্ষই সকলো ধৰণৰ সামৰিক অভিযান এতিয়াই বন্ধ কৰিবলৈ সন্মত হৈছে। ইয়াৰ লগতে ইখনে সিখন দেশৰ সাৰ্বভৌমত্ব আৰু ভৌগোলিক অখণ্ডতাক সন্মান জনোৱাৰ প্ৰতিশ্ৰুতি দিছে। আমেৰিকাই ইৰানৰ ঘৰুৱা বিষয়ত কোনো হস্তক্ষেপ নকৰে আৰু ইৰানেও আঞ্চলিক পৰিৱেশ উত্তপ্ত কৰিব পৰা যিকোনো কাৰ্যকলাপৰ পৰা নিজক আঁতৰাই ৰাখিব। এতিয়াৰে পৰা যিকোনো সমস্যা সামৰিক শক্তিৰ পৰিৱৰ্তে কূটনৈতিক আলোচনাৰে সমাধান কৰা হ’ব।

এই চুক্তিৰ আটাইতকৈ গুৰুত্বপূৰ্ণ দিশটো হৈছে 'হৰমুজ প্ৰণালী' (Strait of Hormuz) পুনৰ মুকলি কৰাৰ সিদ্ধান্ত। বিশ্বৰ প্ৰায় এক-পঞ্চমাংশ খাৰুৱা তেল সৰবৰাহ হোৱা এই অতি গুৰুত্বপূৰ্ণ সাৰ্বজনীন সামুদ্ৰিক পথটো অহা ৩০ দিনৰ ভিতৰত সম্পূৰ্ণ সক্ৰিয় কৰি তোলাৰ লক্ষ্য স্থিৰ কৰা হৈছে। ইয়াৰ উপৰি, ইৰানৰ ওপৰত জাপি দিয়া কিছুমান অৰ্থনৈতিক নিষেধাজ্ঞা শিথিল কৰাৰো প্ৰস্তাৱ লোৱা হৈছে।

হৰমুজ প্ৰণালী স্বাভাৱিক হ’লে ভাৰতো বিশেষভাবে লাভান্বিত হ’ব। সামৰিক সংঘাতৰ বাবে শেহতীয়াকৈ ভাৰতৰ কেইবাখনো বাণিজ্যিক জাহাজ তীব্ৰ সমস্যাৰ সন্মুখীন হৈছিল। অৰ্থনৈতিক বিশেষজ্ঞসকলৰ মতে, এই পথটো মুকলি হ’লে ভাৰতত খাৰুৱা তেলৰ যোগান আকৌ স্বাভাৱিক হৈ পৰিব।

ক্ষেপণাস্ত্ৰৰ বিভীষিকাৰ পৰা আৰম্ভ হোৱা এই যাত্ৰা অৱশেষত সহযোগিতালৈ ৰূপান্তৰিত হ’ল। আন্তঃৰাষ্ট্ৰীয় পৰ্যবেক্ষকসকলৰ মতে, আমেৰিকা-ইৰানৰ এই ঐতিহাসিক মিত্ৰতাই কেৱল মধ্যপ্ৰাচ্যতে স্থিৰতা অনা নাই, বৰঞ্চ যুদ্ধৰ সংকটে জোকাৰি যোৱা বিশ্ব অৰ্থনীতিয়েও এতিয়া সকাহ পোৱাৰ পূৰ্ণ সম্ভাৱনা প্ৰকট হৈ পৰিছে।