ৰামনাথ কোবিন্দ ৭৬, শুভেচ্ছা বাৰ্তাত কি ক'লে প্ৰধানমন্ত্ৰীয়ে?

ডিজিটেল ডেস্ক : দেশৰ ৰাষ্ট্ৰপতি ৰামনাথ কোবিন্দৰ আজি জন্মদিন। আজি ৭৬ বছৰ বয়সত ভৰি দিলে ৰাষ্ট্ৰপতি কোবিন্দে। ১৯৪৫ চনৰ ১ অক্টোবৰত উত্তৰ প্ৰদেশৰ কানপুৰৰ দেহাতত এটি কৃষক পৰিয়ালত জন্ম হৈছিল ৰামনাথ কোবিন্দৰ। তাৰে পৰাই ৰাইছিনা হিলছলৈ তেওঁ এক বৰ্ণময় পৰিক্ৰমা অতিক্ৰম কৰে আৰু দেশৰ ১৪সংখ্যক ৰাষ্ট্ৰপতিৰূপে অধিষ্ঠিত হয়।

তেওঁ কে আৰ নাৰায়ণৰ পাছত ভাৰতৰ দ্বিতীয়গৰাকী দলিত ৰাষ্ট্ৰপতি হোৱাৰ লগতে ভাৰতীয় জনতা পাৰ্টীৰ প্ৰথম ৰাষ্ট্ৰপতি। ২০১৭ চনৰ ২৫ জুলাই তাৰিখে ৰাষ্ট্ৰপতি পদৰ শপত গ্ৰহণ কৰি ৰাষ্ট্ৰপতি পদত অধিষ্ঠিত হৈছিল কোবিন্দ। প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰপতিগৰাকীক জন্মদিনৰ শুভেচ্ছা দি কয়, 'ৰাষ্ট্ৰপতি মহাশয়ক জন্মদিনৰ শুভেচ্ছা। নম্ৰ ব্যক্তিত্বৰে তেওঁ সমগ্ৰ দেশবাসীৰে প্ৰিয় হৈ উঠিছে। সমাজৰ দৰিদ্ৰ আৰু অনগ্ৰসৰ শ্ৰেণীৰ লোকসকলক শক্তিশালী কৰাৰ ক্ষেত্ৰত তেওঁৰ প্ৰচেষ্টা অনুকৰণীয়। তেওঁৰ সুস্বাস্থ্য আৰু দীৰ্ঘায়ু জীৱন কামনা কৰিলোঁ।’

উল্লেখ্য যে প্ৰধানমন্ত্ৰী মোদীৰ লগতে উপ-ৰাষ্ট্ৰপতি ভেংকায়া নাইডু, প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং, দিল্লীৰ মুখ্যমন্ত্ৰী অৰবিন্দ কেজৰিৱালকে ধৰি বিভিন্নজন গুৰুত্বপূৰ্ণ নেতাই ৰামনাথ কোবিন্দক জন্মদিনৰ শুভেচ্ছা জ্ঞাপন কৰে।