আং চাং চ্যু কিৰ বিৰুদ্ধে চাৰি বছৰৰ কাৰাদণ্ড ঘোষণা

ডিজিটেল ডেস্ক: ম্যানমাৰৰ ক্ষমতাচ্যুত নেত্ৰী আং চাং চ্যু কিৰ গৃহবন্দীত্বৰ সময়তে পুনৰ এক খবৰে দখল কৰিছে সংবাদ শিৰোনাম৷ গণতন্ত্ৰপন্থী নেত্ৰী আং চাং চ্যু কিৰ বিৰুদ্ধে সোমবাৰে জান্তা শাসিত বাৰ্মিজ আদালতে এক ৰায়ৰ ভিত্তিত চাৰি বছৰৰ কাৰাদণ্ড ঘোষণা কৰে৷ ৭৬বছৰীয়া নেত্ৰীগৰাকীয়ে দেশখনৰ গণতান্ত্ৰিক চৰকাৰৰ নেতৃত্ব প্ৰদান কৰিছিল৷

জানিব পৰা মতে সেনাবাহিনীৰ বিৰুদ্ধে বিভিন্ন মতপোষণ কৰা তথা ক’ভিড প্ৰট’কল উলংঘা কৰি উত্তেজনাৰ সৃষ্টি কৰাৰ অপৰাধ আছিল নেত্ৰীগৰাকীৰ বিৰুদ্ধে৷ উল্লেখ্য যে, ম্যানমাৰৰ আইন অনুসৰি এই নিয়ম ভংগ কৰা যিকোনো অভিযুক্ত লোকক সৰ্বাধিক দুই-তিনি বছৰৰ বাবে কাৰাদণ্ডৰ শাস্তি আছিল৷

নোবেল বঁটা বিজয়ী নেত্ৰীগৰাকীক ৭ ফেব্ৰুৱাৰীৰ পৰা দেশখনৰ সামৰিক অভ্যুত্থানৰ ফলশ্ৰুতিত গৃহবন্দিত্বৰ জীৱন পাৰ কৰি আহিছে৷ তেওঁৰ সৈতে নেচনেল লীগ ফৰ ডেম’ক্ৰেচীৰ বহুকেইজন নেতা-নেত্ৰীকো গৃহবন্দী কৰি ৰখা হৈছে৷ আং চাং চ্যু কিৰ বিৰুদ্ধে ক’ভিড বিধি উলংঘনৰ বহুকেইটা অভিযোগ থকাৰ লগতে ৰাষ্ট্ৰদ্ৰোহৰ গোচৰতো অভিযুক্ত হৈ আছিল৷ সামৰিক অভ্যুত্থানৰ সময়ত আং চাং চ্যু কিৰ বিৰুদ্ধে প্ৰায় ১২টা গোচৰ ৰুজু কৰিছিল সামৰিক চৰকাৰে৷ ইয়াৰ ভিতৰত ৰাষ্ট্ৰৰ গোপন তথ্য প্ৰচাৰ, নীতি বহিঃভূতভাৱে ৱাকি টকি ৰখাৰ উপৰি বহুকেইটা গোচৰ ৰুজু হৈছিল৷

উল্লেখ্য যে জান্তা চৰকাৰে দাবী কৰা মতে গৃহবন্দীৰ সময়ছোৱাত আং চাং চ্যু কি সুস্থ অৱস্থাতে আছে৷ ইয়াৰ উপৰি গৃহবন্দী কৰি ৰখা প্ৰতিগৰাকীকে ক’ভিড ভেকচিন প্ৰদান কৰা হৈছে৷