ডিজিটেল ডেস্কঃ মৰ্মান্তিক! এক কৰুণ দুৰ্ঘটনাত প্ৰাণ হেৰুৱালে ছয়গৰাকী মন্দিৰ দৰ্শনাৰ্থীয়ে। এই কৰুণ ঘটনা সংঘটিত হৈছে অন্ধ্ৰপ্ৰদেশত। বালাজী মন্দিৰ চাই ঘৰলৈ উভতি অহাৰ পথত অন্ধ্ৰপ্ৰদেশৰ চিত্তোৰ জিলাত দেওবাৰে এই শোকাৱহ পথ দুৰ্ঘটনাটো সংঘটিত হয়। জানিব পৰা মতে, মন্দিৰ দৰ্শনাৰ্থী কঢ়িওৱা তীব্ৰবেগী বাহনখনে নিয়ন্ত্ৰণ হেৰুৱাই ডিভাইডাৰত খুন্দা মৰাৰ ফলতে এই দুৰ্ঘটনাটো সংঘটিত হয়।
বাহনখনত আছিল ৮গৰাকী লোক।ডিভাইডাৰত খুন্দা মৰাৰ পাছতে বাহনখন ৰাজপথৰ মাজত লুটি খাই পৰে আৰু বাহনখনত জুই জ্বলি উঠে। মৰ্মান্তিক দুৰ্ঘটনাটোত ৫জন লোকৰ থিতাতে মৃত্যু হোৱাৰ লগতে এজনৰ হাস্পতালত মৃত্যু হয়। এই দুৰ্ঘটনাত মৃত্যুমুখত পৰিল এটি ছমহীয়া শিশুও। দুজন লোকৰ প্ৰাণ ৰক্ষা পৰে।
গুৰুতৰভাৱে আহত লোক দুজনক ততাতৈয়াকৈ হাস্পতালত ভৰ্তি কৰোৱা হয়। পৰৱৰ্তী সময়ত ঘটনাস্থলীত অন্ধ্ৰপ্ৰদেশ আৰক্ষীৰ এটা দল উপস্থিত হয় আৰু মৃতদেহসমূহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। এই ঘটনাই সমগ্ৰ অন্ধ্ৰপ্ৰদেশত গভীৰ শোকৰ ছাঁ পেলাইছে।
আৰু পঢ়কঃ বনভোজ খাবলৈ গৈ ধনশিৰিৰ বুকুত নিখোজ নুমলীগড় শোধনাগাৰৰ জ্যেষ্ঠ অভিযন্তা
