বিমান বন্দৰ নে মাছৰ বজাৰ ? উলংঘা নীতি-নিয়ম

নতুন দিল্লী : ক’ভিড, অ’মিক্ৰনৰ শংকাই এতিয়া বাৰুকৈয়ে খেদিছে সাধাৰণ জনতাক৷ দেশত ২১জন অ’মিক্ৰনত আক্ৰান্ত হোৱাৰ পাছৰেপৰা বৃদ্ধি পাইছে আতংকৰ৷ অ’মিক্ৰনৰ ভয়ত দিল্লী এৰিছে বহু লোকে৷ আজি দিল্লী বিমান বন্দৰত গৃহমুখী হোৱা লোকৰ সংখ্যাই চকু কপালত তুলিছে৷ কেন্দ্ৰীয় তথা ৰাজ্যিক চৰকাৰে অ’মিক্ৰনৰ সংক্ৰমণ ৰোধৰ বাবে কঠোৰ নীতি-নিয়ম বান্ধি দিয়াৰ পাছতো আজি শতাধিক লোকে ইন্দিৰা গান্ধী আন্তঃৰাষ্ট্ৰীয় বিমান বন্দৰত এই নিয়ম উলংঘা কৰা দেখা গ’ল৷

আন্তঃৰাষ্ট্ৰীয় বিমান বন্দৰটোত কোনো সামাজিক দূৰত্ব মানি চলা পৰিলক্ষিত নহ’ল৷ ছ’চিয়েল মিডিয়াযোগে ভাইৰেল হোৱা বিমান বন্দৰৰ ফটোৰ পাছতে তীব্ৰ প্ৰতিক্ৰিয়াৰ সৃষ্টি হৈছে৷ কেন্দ্ৰীয় স্বাস্থ্য বিভাগে অন্য ৰাষ্ট্ৰৰ পৰা অহা লোকৰ বাবে কঠোৰ নিয়ম বান্ধি দিয়াৰ পাছতো যাত্ৰীসকলৰ অভাৱনীয় ভিৰ তথা অশৃংখলীত কাৰ্য-কলাপে বিপদ মাতিব পাৰে দেশবাসীলৈ৷ ইয়াৰ উপৰি বিভিন্ন ৰে’ল ষ্টেচনতসমূহতো অভাৱনীয় ভিৰ পৰিলক্ষিত হৈছে৷ কোনোধৰণৰ চৰকাৰী নীতি-নিৰ্দেশনা মানি নচলি এক অনাকাংশিত পৰিস্থিতিৰ সৃষ্টি কৰিছে এইসকললোকে৷

এই বিমান বন্দৰ তথা ৰে'লৱে ষ্টেচনসমূহত যাত্ৰী নিয়ন্ত্ৰণ তথা নীতি-নিৰ্দেশনা পালন নকৰিলে অতি সোনকালে নিসন্দেহে ‘ক’ভিড হটস্পট’ হিচাপে পৰিগণিত হ’ব৷ দক্ষিণ আফ্রিকা, বটছুৱানা, ঘানা, হংকং, হংলেণ্ড, ইটালীসহ হউৰোপীয় দেশসমূহ, ইজৰাইল, জার্মানী, কানাডা, পর্তুগাল আদিকে ধৰি বিশ্বৰ প্রায় ৩০খন দেশত শেহতীয়াকৈ উদ্বেগজনক হাৰত সংক্রমণ ধৰা পৰিছে ক’ভিডৰ নতুন প্রজাতি অ’মিক্রন৷ ভাৰততো দেওবাৰে ১৭জন নতুনকৈ আক্ৰান্ত হোৱাৰ কথা ধৰা পৰিছে৷