আৰু সহিব নোৱাৰোঁ... কেন্সাৰ আক্ৰান্ত পুত্ৰৰ যন্ত্ৰণা চাব নোৱাৰি প্ৰাণ ল'লে পিতৃয়ে

ডিজিটেল ডেস্কঃ নিজ পুত্ৰৰ কষ্ট, দুখ-বেদনা সহ্য কৰিব নোৱাৰি চিৰদিনৰ বাবে পৃথিৱীৰ পৰা বিদায় দিয়াৰ কথা চিন্তা কৰিলে এজন পিতৃয়ে৷ নিজ চকুৰ আগত সন্তানৰ মৃত্যু কোনো পিতৃ-মাতৃৱে চাব নিবিচাৰে কিন্তু কিমান কষ্টত ভুগি থাকিলে এজন পুত্ৰক পিতৃৱে নিজেই বিদায় জনাব পাৰে, সেই কথা নিশ্চয় ভাবিবলগীয়া৷ তামিলনাডু চালেমৰ পৰা আহিছে এক বেদনাদায়ক খবৰ৷ পেৰিয়াস্বামী নামৰ এজন লোকৰ ১৪ বছৰীয়া পুত্ৰ ভান্নাথমিজান এবছৰ দিন ধৰি হাড়ৰ কেন্সাৰ ৰোগত ভুগি আছিল৷

কেন্সাৰে গ্ৰাস কৰা ভান্নাথমিজানৰ জীৱন তিলতিলকৈ মৃত্যুৰ মুখলৈ গতি কৰিলে৷ যোৱা এবছৰে বিষত কেঁকাই গেঁথাই থকা পুত্ৰক দেখি নীৰৱে চকুলো টুকে পেৰিয়াস্বামীয়ে৷ পুত্ৰ ভান্নাথমিজানক সুস্থ কৰি তুলিবলৈ তেওঁ বহু চিকিৎসাও কৰালে কিন্তু কোনো ফল নধৰিল৷ দিনে-ৰাতিয়ে বিষত কান্দি থকা পুত্ৰক দেখি পিতৃ পেৰিয়াস্বামীয়ে এক কঠোৰ সিদ্ধান্ত লবলৈ বাধ্য হ'ল৷ পু্ত্ৰক এই যমৰ যাতনাৰ পৰা মুক্তি দিবলৈ পেৰিয়াস্বামীয়ে তেওঁৰ ভেঙ্কটেশন নামৰ এজন বন্ধুক যোগাযোগ কৰে৷ ভেঙ্কটেশন এগৰাকী ৰসায়নবিদ৷ তেওঁৰ আছে নিজা পৰীক্ষাগাৰ৷

বন্ধু ভেঙ্কটেশনক নিজ পুত্ৰৰ বেদনাৰ কথা তেওঁ খুলি কয়৷ পেৰিয়াস্বামীয়ে কিবা এটা উপায় দিয়াৰ কথা কয় বন্ধুক৷ বন্ধুৰ মৰ্মবেদনা বুজিব পাৰি ভেঙ্কটেশনে তেওঁৰ চিকিৎসক বন্ধু প্ৰভুৰ সৈতে যোগাযোগ কৰে৷ কেনেকৈ এই দুখ-কষ্টৰ পৰা ভান্নাথমিজানক মুক্তি দিব পাৰি,তিনিও সেই কথা আলচ কৰিলে৷ এই আলোচনাৰ পিছত ভেঙ্কটেশন আৰু প্ৰভূৱে পেৰিয়াস্বামীক এটা বেজী হাতত তুলি দিয়ে আৰু ঘৰলৈ গৈ সেই বেজী পুত্ৰক দিবলৈ কয়৷

ঘৰলৈ গৈ পুত্ৰ ভান্নাথমিজনক এই বেজী দিয়ে পেৰিয়াস্বামীয়ে৷ যাৰ ফলত মৃত্যুক সাৱটি লয় ভান্নাথমিজনে। আৰক্ষীৰ সূত্ৰই প্ৰকাশ কৰা অনুসৰি চিকিৎসক প্ৰভুৱে তিনিটা ঔষধৰ মিশ্ৰণ বেজী দিছিল৷ এই বেজীৰ 'অভাৰ ডোজ'ৰ বাবে মৃত্যুমুখত পৰে কিশোৰটি৷ গোচৰটো পোহৰলৈ অহাৰ পাছত পেৰিয়াস্বামী, ভেঙ্কটেশন আৰু প্ৰভুক তামিলনাডুৰ কংগুনাপ্ৰম আৰক্ষীয়ে ধাৰা ১০৯(অপৰাধৰ বাবে প্ৰৰোচিত)ৰ অধীনত এটা গোচৰ ৰুজু কৰি গ্ৰেপ্তাৰ কৰে৷ ঘটনাৰ সন্দৰ্ভত পৰৱৰ্তী অনুসন্ধান চলাই আছে কংগুনাপ্ৰম আৰক্ষীয়ে৷