বৰ জীয়ৰীয়ে পালে নতুন চাকৰি; মন্দিৰলৈ গৈ পথ দুৰ্ঘটনাত নিঃশেষ হ’ল এটা পৰিয়াল

ডিজিটেল ডেস্কঃ এক শোকাৱহ পথ দুৰ্ঘটনাত নিঃশেষ হ’ল এটা পৰিয়াল। পৰিয়ালটোৰ ডাঙৰ জনী জীয়ৰীয়ে বহুজাতিক মাল্টিনেচনেল কোম্পানীত লাভ কৰিছিল এটা নতুন চাকৰি। বৰ জীয়ৰীয়ে মাহে ৮ লাখ ৫০ হাজাৰ দৰমহাৰ চাকৰি পোৱাৰ খবৰে আনন্দিত কৰি তুলিছিল পিতৃ-মাতৃৰ লগতে ভায়েক আৰু ভনীয়েকক। এই ভাল খবৰটোৰ বাবে মাতা মনসা দেৱীৰ মন্দিৰত মূৰ দোঁৱাবলৈ গৈছিল পৰিয়ালটো। কিন্তু উভতি অহাৰ সময়ত সংঘটিত ভয়ংকৰ পথ দুৰ্ঘটনাত শেষ হৈ গল সকলো সোণালী সপোন।

দেওবাৰে নিশা পঞ্জাৱৰ পাটিয়ালা-চাংৰুৰ পথৰ ভাক্ৰা খালত নিয়ন্ত্ৰণ হেৰুৱাই পৰিয়ালটোৱে যাত্ৰা কৰা চুইফ্ট গাড়ীখন বাগৰি পৰে। এই দুৰ্ঘটনাত মাতৃ আৰু জ্যেষ্ঠ কন্যাৰ মৃত্যু ঘটাৰ লগতে পৰিয়ালৰ বাকী তিনিজন সদস্য সন্ধানহীন হৈ আছে।উল্লেখ্য যে, বাহনখনৰ ভিতৰত আছিল ভাটিণ্ডাৰ ৰামপুৰা ফুলৰ নিবাসী জচবিন্দৰ কুমাৰ (৫২), তেওঁৰ পত্নী নীলম গাৰ্গ (৫০), দুই কন্যা সমীতা গাৰ্গ (২৬), ঈশা গাৰ্গ (২৪) আৰু পুত্ৰ পিৰু গাৰ্গ (৯)।

এজন প্ৰত্যক্ষদর্শীয়ে খালত গাড়ীখন ডুব যোৱা প্ৰত্যক্ষ কৰি স্থানীয় আৰক্ষীক খবৰ দিয়াত ডুবাৰু বাহিনীৰ সৈতে ঘটনাস্থলীত উপস্থিত হয় আৰক্ষীৰ দল। কিন্তু ঘন কুঁৱলী আৰু ঠাণ্ডাৰ বাবে ডুবাৰু বাহিনীয়ে ডুব যোৱা বাহনখনৰ সন্ধান উলিওৱাত ব্যৰ্থ হয়। সোমবাৰে পুৱা প্ৰায় ৮ বজাত পুনৰ ডুবাৰু বাহিনীয়ে অভিযান চলোৱাত বাহনখনৰ লগতে মাতৃ নীলম গাৰ্গ আৰু জ্যেষ্ঠ কন্যা সমীতা গাৰ্গৰ মৃতদেহ উদ্ধাৰ হয়। অৱশ্যে এতিয়াও পৰিয়ালটোৰ আন তিনিজন সদস্য সন্ধানহীন হৈ আছে।

আৰক্ষীয়ে ধাৰা ১৭৪ চিআৰপিচিৰ অধীনত এটা গোচৰ ৰুজু কৰিছে আৰু অভিযান অব্যাহত ৰাখিছে। সমীতা গাৰ্গে ভাটিণ্ডাৰ এটা বহুজাতিক কোম্পানীত ৮.৫ লাখৰ পেকেজত নিযুক্তি লাভ কৰিছিল। এই আনন্দতে দেওবাৰে প্ৰথমে ঘৰত এক ধৰ্মীয় অনুষ্ঠানৰ আয়োজন কৰা হয়। তাৰ পিছত পৰিয়াটোৱে মূৰ দোঁৱাবলৈ পঞ্চকুলাৰ মাতা মনসা দেৱী মন্দিৰলৈ যায়। কিন্তু বাটত ৰৈ আছিল কাল নিয়তি। শেষ হৈ গ'ল সুন্দৰ আৰু সুখী বুলি পৰিচিত এটা পৰিয়াল। এই শোকাৱহ দুৰ্ঘটনাই সমগ্ৰ পঞ্জাৱতে পেলাইছে গভীৰ শোকৰ ছাঁ।

আৰু পঢ়কঃ ‘ভাল ল’ৰাই মাকক আমনি নকৰে’; সদ্যজাত শিশুক বুজনি চিকিৎসকৰ, ভিডিঅ’ ভাইৰেল