বাদশ্বাহ পুত্ৰৰ উতনুৱা কাণ্ড, থৰক-বৰক অৱস্থা শ্বাহৰুখৰ

নতুন দিল্লীঃ বাদশ্বাহ পুত্ৰৰ ড্ৰাগছ কাণ্ডই লৈছে নতুন ৰূপ। আৰিয়ানৰ বিৰুদ্ধে সাক্ষ্য দিয়া ব্যক্তিগত চোৰাংচোৱাৰ পুনে জালিয়াতিৰ গোচৰত পলাতক আচামী! গোয়েণ্ডা সদস্য কেপি গোছাভীৰ শেহতীয়া ভাইৰেল ফটোক লৈ বিতৰ্ক হৈছে সামাজিক মাধ্যমত। ড্ৰাগচৰ বেহাৰ সৈতে বিজেপি নেতা জড়িত থকা বুলিও দাবী কৰিছে এনচিবি-এ। ইফালে এনে প্ৰতিবেদনৰ পাছত ফটোখনক লৈ সৰৱ হৈ পৰিছে নেচনেলিষ্ট কংগ্ৰেছ পাৰ্টি। এনচিবিৰ অভিযানত কেপি গোছাভী আৰু বিজেপি নেতাৰ নাম কেনেকৈ আহিল বুলি প্ৰশ্ন এনচিপিৰ।

পুনে আৰক্ষীৰ মতে, ২০১৮ চনৰ পুনেৰ এক জালিয়াতি গোচৰত অভিযুক্ত আছিল গোয়েণ্ডা গোছাভী। সম্প্ৰতি আৰক্ষীৰ চকুত ধূলি দি পলাই ফুৰিছে আচামী গোছাভীয়ে। ২০১৯ত পুনে আৰক্ষীয়ে এখন অভিযোগপত্ৰ দাখিল কৰিছিল আৰু চিআৰপিচিৰ ধাৰা ৮২-ৰ অধীনত অভিযুক্ত গোছাভী পলাতক বুলি অভিমত প্ৰদান কৰিছিল। উল্লেখ্য যে, পুনেৰ বাসিন্দা চিন্ময় দেশমুখ গোছাভী আৰু তেওঁৰ কোম্পানী কেপিজি ড্ৰীমছলিউছনে ৩.০৯ লাখ টকাৰ প্ৰৱঞ্চনা কৰিছিল। চিন্ময় দেশমুখে ২০১৮ চনৰ মে’ মাহত পুনেত গোছাভীৰ বিৰুদ্ধে প্ৰৱঞ্চনা আৰু জালিয়াতিৰ অভিযোগত গোচৰ ৰুজু কৰিছিল। দেশমুখে অভিযোগ কৰিছিল যে, গোছাভী আৰু তেওঁৰ কোম্পানীয়ে তেওঁক বিদেশত চাকৰিৰ প্ৰতিশ্ৰুতি দি প্ৰতাৰণা কৰিছিল।

ইফালে, মায়ানগৰীত ড্ৰাগছ সৰবৰাহকাণ্ডৰ সৈতে এজন বিজেপি নেতা আৰু এজন পলাতক অভিযুক্ত জড়িত থকাৰ বাতৰি পোহৰলৈ অহাৰ লগে লগে ৰাজনৈতিক তৰ্ক-বিতৰ্কৰ সৃষ্টি হৈছে। একাংশৰ মতে, উদ্দ্যেশ্য প্ৰণোদিতভাৱে শ্বাহৰুখ পুত্ৰক বলিৰ পঠা সজোৱা হৈছে। আৰিয়ান ড্ৰাগছ আসক্ত হ'ব পাৰে কিন্তু তেওঁৰ গ্ৰেপ্তাৰৰ আঁৰত ৰাজনৈতিক উদ্দেশ্য থকা বুলিও হনুবাৰ্তা ওলাইছে।

অৱশ্য, এতিয়াও শূন্য সহনশীল স্থিতি গ্ৰহণ কৰিছে এনচিবি-এ। আদালতে বৃহস্পতিবাৰে আৰিয়াৰ জামিন আবেদন নাকচ কৰে আৰু ১৪ দিনৰ ন্যায়িক জিম্মালৈ প্ৰেৰণ কৰে। অন্তৱৰ্তীকালীন জামিন আবেদনৰ শুনানিৰ বাবে আজি পুনৰ আদালতত হাজিৰ কৰোৱা হয় বাদশ্বাহ পুত্ৰক । মেট্ৰ'পলিটান মেজিষ্ট্ৰেট আদালতে ক্ৰুজ ৰেভ পাৰ্টি গোচৰত গ্ৰেপ্তাৰ কৰা ৮জনক ১৪ দিনৰ ন্যায়িক জিম্মালৈ প্ৰেৰণ কৰাৰ এদিন পিছত পুনৰ আদালতত হাজিৰ বাদশ্বাহ পুত্ৰ। প্ৰশ্ন উত্থাপিত হৈছে, সঁচাকৈ বাদশ্বাহ পুত্ৰই ৰাজনৈতিক ষড়যন্ত্ৰৰ বলি হৈছে নেকি? যদি হৈছে তেন্তে কিহৰ বাবে বাদশ্বাহেৰে এই শত্ৰুতা ? তাৰ বাবে আমি হয়তো কিছু দিন অপেক্ষা কৰিব লাগিব!