বাদশ্বাহৰ সাম্ৰাজ্যত কঁপনি : আৰিয়ানক গ্ৰেপ্তাৰ, এনচিবি-এ জব্দ কৰিলে কি কি ড্ৰাগছ?

ডিজিটেল ডেস্ক : নাৰ্কোটিকছ কণ্ট্ৰোল ব্যুৰোৰ আগ্ৰাসনত কঁপি উঠিল বলীউডৰ বাদশ্বাহৰ সাম্ৰাজ্য। বাদশ্বাহ শ্বাহৰুখৰ পুত্ৰ আৰিয়ান খান গ্ৰেপ্তাৰ হ’ল ড্ৰাগছৰ গোচৰত। ২৩ বছৰীয়া আৰিয়ানক এনচিবিয়ে আটক কৰি জেৰাৰ কৰাৰ পাছত দেওবাৰে আনুষ্ঠানিকভাৱে গ্ৰেপ্তাৰ কৰিছে।

মুম্বাইৰ এখন বিলাসী জাহাজত পাৰ্টী কৰি থকাৰ পৰা এনচিবিয়ে অতৰ্কিত অভিযানৰ জৰিয়তে শনিবাৰে নিশা আটক কৰিছিল আৰিয়ান খানসহ আঠজনক। শেহতীয়াকৈ আঠোজনকে গ্ৰেপ্তাৰ কৰাৰ কথা সংস্থাটোৰ ফালৰপৰা নিশ্চিত কৰা হৈছে। আৰিয়ানৰ পিতৃ বলীউডৰ মহাতাৰকা শ্বাহৰুখ খানে এই গ্ৰেপ্তাৰৰ খবৰ লাভ কৰাৰ পাছতে অধিবক্তাৰ কাৰ্যালয়লৈ ৰাওনা হোৱা বুলি জানিব পৰা গৈছে। আৰিয়ান খানৰ লগতে গ্ৰেপ্তাৰ হোৱাসকলৰ মাজত আছে মুনমুন ধামেচা, নুপুৰ ছাৰিকা, ইছমীট সিং, মোহক জেছৱাল, বিক্ৰান্ত চোকাৰ, গোমিত চোপ্ৰা আৰু আৰবাজ মাৰ্চেণ্ট। এই ঘটনা সংক্ৰান্তত এনচিবিয়ে কোনো যুৱতীক গ্ৰেপ্তাৰ কৰা নাই বুলি সদৰি কৰিছে। উল্লেখ্য যে, Ecstasy, Cocaine, MD (Mephedrone) আৰু গাঁজাৰ দৰে নিষিদ্ধ নিচা পাৰ্টীৰ পৰা এনচিবিয়ে জব্দ কৰা বুলিও প্ৰকাশ পাইছে। আটাইকেইজনৰে ষ্টেটমেণ্ট ৰেকৰ্ড কৰাৰ পাছত তেওঁলোকক এনডিপিএছ আদালতত হাজিৰ কৰাব সংস্থাটোৱে।