বেংকৰ লকাৰ ৰুমত ১৮ ঘণ্টা আবদ্ধ হৈ থাকিল ৮৪ বছৰীয়া বৃদ্ধ!

ডিজিটেল ডেস্ক : বেংকৰ ভিতৰত ভুলতে আবদ্ধ হৈ থাকিল এক বয়োজ্যেষ্ঠ ব্যক্তি৷ আৰক্ষীয়ে মঙলবাৰে জনোৱা মতে বেংকৰ কৰ্মচাৰীসকলে দুৰ্ঘটনাবশতঃ তেওঁক চৌহদৰ ভিতৰতে বন্ধ কৰি গুচি যায়৷ ৮৪ বছৰীয়া ব্যক্তিগৰাকীয়ে তাৰ পাছতে হায়দৰাবাদ বেংকৰ লকাৰ ৰুমত এটা ৰাতি কটাবলগা হয়৷ মঙলবাৰে পুৱাহে বেংকৰ লকাৰ ৰূমৰ ভিতৰত প্ৰায় ১৮ ঘণ্টা (সোমবাৰে আবেলি ৪.৪০ বজাৰ পৰা আজি ৰাতিপুৱা ১০.৩০ বজালৈ) অতিবাহিত কৰা লোকজনক আৰক্ষীয়ে উদ্ধাৰ কৰে৷ সেই সময়ছোৱাত তেওঁক অৰ্ধ-অচেতন অৱস্থাত লকাৰ ৰুমৰ মজিয়াত পৰি থকা দেখিছিল আৰু লগে লগে তেওঁক এখন চিকিৎসালয়লৈ প্ৰেৰণ কৰিছিল। বৃদ্ধ ব্যক্তিগৰাকীয়ে সোমবাৰে সন্ধিয়া তেওঁৰ লকাৰ খুলিবলৈ বেংকলৈ গৈছিল কিন্তু বেংকৰ কৰ্মচাৰীসকলে স্পষ্টভাৱে তেওঁক লক্ষ্য কৰা নাছিল আৰু চৌহদটো বন্ধ কৰি গুচি গৈছিল৷ জুবিলি হিলছ আৰক্ষী থানাৰ পৰিদৰ্শক এছ ৰাজশেখৰ ৰেড্ডীয়ে কয় যে ডায়েবেটিছ ৰোগী বৃদ্ধগৰাকী ঘৰলৈ উভতি নহাৰ বাবে পৰিয়ালৰ সদস্যসকলে আৰক্ষীৰ ওচৰত নিৰুদ্দেশৰ গোচৰ ৰুজু কৰে৷ তদন্তৰ সময়ত আৰু চিচিটিভি ফুটেজ পৰীক্ষা কৰাৰ পাছত সোমবাৰে সন্ধিয়া বেংক চৌহদত বৃদ্ধজনক প্ৰৱেশ কৰা লক্ষ্য কৰে৷ চিচিটিভি ফুটেজ অনুসৰি আৰক্ষীয়ে বেংকৰ চৌহদত তলা বন্ধ কৰি সকলো কৰ্মচাৰী গুচি যোৱাৰ পাছত বৃদ্ধজনক বাহিৰলৈ ওলাই অহা দেখা নাপালে আৰু তাৰ পাছতে তেওঁ বেংকৰ ভিতৰতে আবদ্ধ হৈ থকাৰ কথা নিশ্চিত কৰা হয়৷ উল্লেখ্য যে, সোমবাৰে ব্যক্তিগৰাকীয়ে তেওঁৰ মোবাইল ফোনটো লগত কঢ়িয়াই নিয়া নাছিল বুলি জানিবলৈ দিয়ে আৰক্ষীয়ে। এই ঘটনাৰ সন্দৰ্ভত বেংক কৰ্মচাৰীৰ বিৰুদ্ধে গোচৰ ৰুজু কৰাৰ চিন্তা চৰ্চা কৰিছে৷