মুছলিম যুৱকে কোঠাত আঁৰিছিল মোদীৰ ফটো;ভাড়াঘৰৰ মালিকে দিলে মাৰপিটৰ ভাবুকি

ডিজিটেল ডেস্কঃ এজন মুছলমান যুৱকে নিজৰ ভাড়াঘৰৰ কোঠাত প্ৰধানমন্ত্ৰী নৰেন্দ্ৰ মোদীৰ ফটো আঁৰি থোৱা বাবে ভাড়াঘৰৰ মালিকৰ ৰোষৰ বলি হৈছে। যুৱকজনৰ নাম ইউচুফ খান। এই ঘটনা মধ্য প্ৰদেশৰ ইন্দোৰৰ। ইউচুফ খানে আৰক্ষীক অভিযোগ কৰা অনুসৰি তেওঁৰ ভাড়াঘৰৰ মালিক য়াকুৱ মনচুৰী আৰু তেওঁৰ আত্মীয় চুলতান মনচুৰী, শ্বৰীফ মনচুৰীৱে ভাড়াঘৰ খালী কৰিবলৈ হেঁচা প্ৰয়োগ কৰিছে। কেৱল এয়া্ই নহয় যুৱকজনক মাৰপিট কৰাৰো ভাবুকি দিছে ভাড়াঘৰৰ মালিকে। ইউচুফ খানে কয় যে তেওঁ প্ৰধানমন্ত্ৰী মোদীক আদৰ্শ বুলি ভাবে আৰু তেওঁক যথেষ্ট সন্মান কৰে। কেৱল এয়াই নহয় প্ৰধানমন্ত্ৰী মোদীৰ ভাষণৰ কথাবোৰো মানি চলে ইউচুফ খানে। মোদীৰ প্ৰতি থকা সন্মান আৰু ভালপোৱাৰ বাবে যুৱকজনে নিজৰ কোঠাত প্ৰধানমন্ত্ৰী নৰেন্দ্ৰ মোদীৰ এখন ফটো আঁৰি ৰাখিছিল। মোদীৰ লগতে চৰ্ডাৰ বল্লৱভাই পেটেলৰ ফটোও লগাইছিল ইউচুফে। এই কথাতেই খং উঠি ভাড়াঘৰৰ মালিকে ইউচুফ খানক গালি-গালাজ পাৰিবলৈ আৰম্ভ কৰে আৰু ঘৰ খালী কৰিবলৈ কয়। যুৱকজনে আৰক্ষীক এই বিষয়ে অভিযোগ দিয়ে। অভিযোগ শুনি আৰক্ষী বিষয়া মনীষা পাঠকে কয় প্ৰত্যেক নাগৰিকৰ নিজা অভিব্যক্তি প্ৰকাশ কৰাৰ সম্পূৰ্ণ স্বাধীনতা আছে। সেই স্বাধীনতা কোনেও খৰ্ব কৰিব নোৱাৰে। মানুহে নিজৰ কোঠাত নিজ পচন্দ অনুসৰি কাৰ ফটো লগায় সেয়া কোনেও বাধা দিব নোৱাৰে। ইউচুফ খানৰ অভিযোগৰ ভিত্তিত সমগ্ৰ ঘটনাৰ তদন্ত আৰম্ভ কৰিছে ইন্দোৰ আৰক্ষীয়ে। আৰু পঢ়কঃ ১৯৬৬ চনৰ পৰা চলি আছে এখন গাড়ী! অতিক্ৰম কৰিছে ৪৮ লাখ কিলোমিটাৰ